Seleccionar una pagina

Fotomatòn

0 |

FOTOMATÒN – Clement e Veronica – Associacion Ligams

Presentatz-nse lo projècte LA PASSEM, portat per la vòsta associacion.

C : Ligams qu’organiza la corruda La Passem tà deféner e har vàler la lenga occitana, inspirada de la Korrika basca e de la Redadeg bretona. Que s’i va córrer a contunh, sus 400 km enter Bidaishe e Pau, pendent 3 jornadas e 2 nueits, deu divés 25 dinc au dimenge 27 de mai. Los corredors que’s van har passar lo senhau, aperat ligam, e har avançà’u. Los quilomètres que son botats « en venta » tà amassar sòus e finançar projèctes. Se fonciona, que s’i tornaram tots dus ans en adaptar lo trajècte.

Çò qu’ei lo prètzhèit d’ua tau accion ?

C : Dejà, qu’ei botar en ligam las iniciativas e accions qui existeishen peu territòri. Puish, har avançar la lenga. Lo messatge b’ei clar. Ne passa pas en dusau, a l’endarrèr d’animacions culturaus, per exemple.

V : Se lo monde emplegan l’occitan entà har vàler un produit, ua practica, ganhà’s la vita en l’ensenhar, que vòu díser que la lenga e’us hè servici. Dab La Passem, que pòden dar las tornas. A mantuns, en córrer un sengle quilomètre, que s’i podem escàder tà miar lo projècte dinc au cap.

C : En cada endret on passam, que prenem contact dab las comunas e intercomunalitats entaus informar e incitar a desvolopar la transmission de la lenga nosta. L’arribada a Pau que’s harà au quartièr deu Hedàs. La vila qu’a per projècte de’n har un navèth quartièr occitan. Que responem presents dab la Passem, entà marcar lo còp.

Quin participar ?

C : Cadun que i pòt participar a la soa escala. Sol o en grop, en associacions, dab collègas de tribalh… N’ei pas reservat au monde qui an ua practica esportiu. Cadun que s’ac vira dab los sons mejans e a la soa vitessa. Que s’i pòt córrer, har kayak, skateboard, çò que volhim ! Mes se vòs préner lo ligam en man e hà’u avançar, que cau crompar lo quilomètre.

Los qui van córrer que son dejà, per la màger part, benevòles engatjats qui balhan en temps, en energia, e a còps, en moneda ! E son eths qui van enqüèra botar sòus ?

V  : Non, justament, ne volem pas demorar enter occitanistas e har circular la moneda d’ua associacion a l’auta. Que sollicitam associacions, comitats de las hèstas, clubs esportius, enterpresas, comerçants e collectivitats hòra deu hialat dejà implicat. Lo but qu’ei de tocar personas en mei que las qui tocam tostemps. Los bascos per exemple, que hèn lo quilomètre deus politics. Nosauts que volerém de segur s’i escàder tà har córrer los maires, los deputats.

C : Tà har víver la lenga qu’avem besonh sòus. Qu’ei aqueth messatge qui deu passar tanben. La moneda qu’ei completament necessària tà aviar projèctes constructius. Que cau investir tà har víver la lenga.

 

Clement & Veronica – Associacion Ligams

Organizators de LA PASSEM

Corruda per la lenga occitana

25-26-27 de mai

100 € per quilomètre ,donc 40 000 € se tot e’s passa plan. Un còp lo budget d’organizacion remborsat, qué har deus beneficis ?

CM : La grana question ! N’i podem pas respóner adara. L’associacion Ligams que va lançar un aperet a projèctes en favor de la transmission de la lenga. Shens remplaçar los subvencionaires, qu’ajudarà a desvolopar iniciativas e accions concretas.

A prepaus de l'autor

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !