La Femna Meravilha
Massilia, lo grope emblematic dau reggae occitan, nos rapela dins son nom mai dins lor album Chourmo que la capitala provençala fuguet fondada per daus marins grècs en l’an 600 davant nòstra era. L-i porteren lor civilizacion mai lors dieus. E d’après DC Comics, los Olimpians son totjorn en Provença e ne’n an fach lo terren de lor afrontament.
Coneissetz la Princessa Diana de Temiscira ? Meitat amazòna, meitat divessa, filha de Zeus e de la reina Ipolita de Temiscira, nasquet sus quela Isla de Paradís que DC Comics ne’n faguet lo fogier de las Amazònas. Isla interdicha aus umans, Diana ne’n partirá e vendrá la famosa Wonder Woman, la Femna Meravilha. En 2011, DC Comics tòrna començar las istòrias de sos eròis dins de las novelas serias regropadas jos lo nom de New 52. 52 novelas serias, per permetre au monde que coneissen pas l’univers supereroïc de s’i interessar sens legir tot çò que s’es fach dempuei las annadas trenta. La seria consacrada a nòstra eroïna, publicada de 2011 a 2016, será escricha per Brian Azzarello e dessenhada per Cliff Chiang. Azzarello tòrna préner un tema classic de la mitologia greca : la colera d’Era fàcia a la tendéncia de son òme d’engrossar las femnas que passan a sa portada. E Diana se retròba a protegir la progenitura illegitima de son pair, dau mai que ne’n fai partida.
Entau deu protegir lo pitit Zeke, filh de la jòuna Zola. Mas lo contexte de queu raconte es mai que particular : lo tròne a la cima de l’Olimpe es inocupat e mai d’un s’i voudrián ben sietar. Après mai d’una peripecia, Zola, que demòra chas Diana a Londres, decidís de partir. Dins lo metro, rescontra Dio, un jòune òme qu’aviá desjà crosat, e accepta de lo segre en Provença, ente possedís una villa. Son a se permenar dins un bòsc, a la recercha de trufas, la passion de Dio, quand son atacats per un minotaure que vòu capturar Zola. A queu moment, aprenem que Dio es lo dieu Dionís. Eu vai afrontar lo monstre. A Londres, quand Diana compren que Zola a fugit, demanda de l’ajuda a una chaçaira, la divessa Artemis per la retrobar. Entau arriban au moment ente lo minotaure es a batre Dio mai lo capturar. La batalha que sec vei la victòria de la supereroïna mai de sos amics que se van refugiar a Temiscira.
La vision de Provença que balha quel episòdi demòra dins los estereotipes sus la França que podem esperar d’un autor american. Luxe e gastronomia son au rendetz-vos, emb un brave mas dins la garriga, de las trufas de trobar e un restaurant dins lo vinhau. Se lo voletz legir, lo podetz trobar dins la colleccion DC Renaissance chas Urban Comics. Publiqueren las aventuras de Diana dau New 52 dins una seria de 6 tòmes. L’episòdi que se debana en Provença se tròba dins lo numero 6.
