Seleccionar una pagina

Barrutlatges

0 |

Al país de la bèstia

Lo Gavaudan auriá donat son nom als gavaches, los ancians gabales, un pòble cèlta citat per Cesar dins sa Guèrra de las Gaulas. L’etimologia es somesa al debat mas de las aroinas de l’antica ciutat gabala de Javòls (anciana Anderitum) se pòt mesurar los sègles passats sus las nautors de Losera e sentir un vent cargat d’istòria. Aquí sèm plan dins un mond nòrd-occitan, entre causses grands e pendisses del massís central, ròcas sedimentàrias de las mars primalas o barena nascuda de las entralhas terrèstras.

De Javòls pojam sul morre longarut de Margerida, una montanha que s’enauça fins a 1552m al Truc de Fortuniá. Es, excusatz del pauc, lo planestèl de barena (granit) lo mai vast d’Euròpa ! Las pèiras escultadas per la pluèja e la fugida lenta del temps pòblan sas immensitats de figuras fantasmaticas… Margerida, un nom eiretat d’una senhoriá perduda que teniá sas tèrras pròche Vedrinas-Sant- Lop, mai al nòrd, benlèu una rasiga celta encara, una paraula desrivada de « morgarita » : la confinha del ga. Una confinha, justament, atravèrsa aquela esquina cubèrta de brugas : la linha de partatge de las aigas. D’un costat los rius s’en van noirir Garona e de l’autre s’en van noirir Lèira. Sèm, d’alhors, als quatres cantons, al crosament entre Losera, Cantal, Nauta-Lèira e Ardecha. Un còp de mai los limits administratius trocejan un espandi geografic coerent. Una ribièra d’importància, Alèir (Allier en francés), i pren sa sòrga, al Morre de la Gardilha (1503m), non luènh de la vila de Langonha ; es lo refugi dels darrièrs salmons salvatges d’Euròpa occidentala.

Mas es un tot autre animal que marquèt prigondament aquel país : la famosa bèstia del Gavaudan que terrorizèt la populacion locala dins la segonda mitat del sègle 18. Coneissètz l’istòria que faguèt rajar tant de tencha e inspirèt tant d’emissions e de filmes… Ara, lo lop seriá de retorn, ges d’atac suls òmes e ges de panica ! Mai de problèmas novèls pels pastres que devon trobar un mejan d’aparar sas bedigas. Per observar aquel animal majestuós que patís tròp sovent de sa marrida reputacion, podètz visitar lo pargue dels lops del Gavaudan, en tota patz, a Sant-Legièr-de-Pèira. Margerida es una tèrra d’escorreguda, mai d’un GR i passa, coma lo torn de Margerida o lo plan mai conegut camin de Stevenson que, del Puèi-de-Velai cap a Alès en Cevena, s’engulha al sud del massís. Es un camin que repren lo barrutlage de l’escrivan viatjaire Robert Louis Stevenson, autor de Viatge amb un aze dins las Cevenas, una narracion al ritme de la marcha, dins la Losera de 1878.

De l’autre costat de Margerida, a Sant-Alban-de-Limanhòla, foguèt inventat lo concèpte de psicoterapia institucionala per François Tosquelles, un exiliat catalan a las idèas avantgardistas. Tèrra de resisténcia e de libertat, Margerida es tanben lo luòc de la batalha del Mont Mochet, qu’en junh de 1944 opausèt la Resisténcia francesa a la Wehrmacht. Aquel buf de libertat lo sentiretz, sus aquelas nautas tèrras gavachas que tutejan lo cèl, a pè, segur, al ritme del còr e de las cambas.

A prepaus de l'autor

Laissar un comentari

avatar

This site uses Akismet to reduce spam. Learn how your comment data is processed.

  Soscriure  
M'assabentar quand

M’aboni !

Anóncia

Compte-rendut: Lo Diari, vòstre vejaire nos interèssa !

Los darrièrs clips

Cargament...

La letra del Diari

Los darrièrs comentaris

    Soscrivètz a nòstra letra d'informacions !

    Soscrivètz a nòstra letra d'informacions !

    Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

    Avètz soscrich amb succès !