Mateu Blas, un compendi a l’estadi
En novembre passat nos passèt jos los uèlhs una aisina qu’atraguèt la nòstra atencion : un Compendi de gramàtica nissarda (disponible dins doas grafias, classica o mistralenca). Una espleita que sembla eficaça per « emparar lo niçard » ! Signat de biais un pauc misteriós per @OcGCNissa, @Etrusconissart e @QVLDissata (en fait de chafres pel malhum social Twitter) nais de la collaboracion entre un estudiant, un linguista e un fanzine de foot ! Sèm anats al rescontre de Mateu Blas, qu’es a l’origina del projècte, per ne saber mai sul ligam entre lenga e football a Niça.
Mateu Blas es un estudiant en 3ena annada d’occitan a l’universitat de Montpelhièr. Seguís los corses a distància, qu’es de Niça e qu’acaba de sortir de la Lyon Business School. Coma aviá besonh d’enriquesir lo seu vocabulari, entreprenguèt de se bastir una tièra de mots e d’expressions niçardas istòria de « melhorar l’escrich », un trabalh de formiga. Sèm aquí a l’ivèrn de 2020, e quora tombèt lo confinhament, lo projècte prenguèt un ample mai ambiciós. Mateu embarquèt lo linguista professor de latin, Gili Van Heems, dins l’aventura. « Es pròpi rigorós, ai augut l’idèa e après ai seguit çò que calia faire, Gili es acostumat d’aqueu travalh » çò precisa. An fargat un polit libret de presentacion de la lenga, didactic… e gratuit.
Per que lo projècte posquèsse espelir, se pausèt a un moment la question de l’argent : qual deviá pagar per aquò ? La responsa foguèt clara : lancèron un finançament participatiu que los contributors boclèron en 4 jorns ! Un centenat de dons, coma tan de pròvas que mancava al monde un libret de gramatica modèrna. E tanben la pròva que Mateu èra « pas un pantaiaire completament fòl ».
Es de notar que l’iniciativa de Mateu e Gili recebèt lo sosten de l’associacion dels professors de lengas regionalas (APLR) e de la cadena YouTube Cultura Viva. La mesa en pagina es estada ela realizada per Bruno Martel, lo cap-redactor de la revista Quoura Ven Lou Dissata, un fanzine pels afogats de l’OGC Niça, que Mateu Blas i escriviá ja una cronica en niçard dedins.
Aital, aquesta Gramàtica Nissarda es uei distribuida a la botiga oficiala del club, amb lo fanzine, e se telecarga sul site de Quoura Ven Lou Dissata.
Aqueste jove diplomat de 24 ans es a fargar de palancas entre sas doas passions, l’occitan e lo balon. Los afogats dels « aglons » coneisson ben lo Mateu pr’amor qu’anima tanben un compte Twitter, @OcGCNissa, que fa lo rebat de l’actualitat de l’equipa en negre e roge. E son 1 400 de lo seguir mentre que parla pas que niçard ! Per Mateu « la promiera entrada facila per la cultura niçarda si passa un pauc a l’estadi, l’identitat niçarda si transmet a travers lo balon », e aquò se confirma cada dimenjada, que vesèm de mai en mai la lenga dins l’estadi de Niça mas tanben dins los autres clubs coma Tolosa o Montpelhièr, o encara dins los estadis de rugbi. Un pauc d’occitan dins la comunicacion oficiala o sus lo camisòt fa rampèl de l’identitat de la vila, es una valor qu’a de pes al prèp dels partenaris e dels suportaires. Çaquelà, la lenga se fa mai que mai veire e ausir dins las tribunas, los clubs d’ultras fargan de bandairòlas (dels messatges mai o mens pertinents) en occitan, se sentís una enveja collectiva de partejar de simbòls fòrts de la cultura locala, e la lenga n’es un, de tria. E mercés a de monde coma Mateu, s’encamina sus de sendièrs oblidats de l’occitanisme…
Lo projècte venent serà un « programa off » per cada rescontre de l’OGC Niça a l’ostal, un libret amb totas las informacions, qu’agradan al afogats de l’equipa, e plan segur serà estampat dins la lenga de Garibaldi.
