E se los extraterrèstres parlavan occitan ?
Sufís de somiar a l’immensitat de l’univèrs e al nombre de planetas e nos pausam lèu la question de saber se sèm los sols a l’abitar. Sabèm plan, gràcias als filmes de Hollywood, que dins lo cas ont un jorn d’extraterrèstres nos vendrián visitar, parlarián anglés amb un polit accent american. Mas s’èra pas lo cas ? Es l’idèa qu’an agut los creators de l’Occitània Box, un jòc pedagogic elaborat per l’Ofici public de la lenga occitana (OPLO) per d’escolans de tresena o de segonda, en collaboracion amb la societat especializada Escape Creation.
Imaginem un pauc… Pontualament, los extraterrèstres visitan nòstra planeta, e lo darrièr còp èra fa mai d’un sègle. D’aquel temps, los abitants parlavan occitan, es doncas la lenga qu’an decidit d’apréner per poder comunicar amb eles. Après de decennias a estudiar Mistral, Bodon, Delpastre e los autres, lor vaissèl espacial desbarca al dessús d’un licèu e ensajan de dintrar en contacte amb un grop d’escolans. Es lo scenari d’aqueste escape game occitan, un jòc de ròtle ont los participants se retròban embarrats dins una pèça e an un temps limitat per ne sortir. Per capitar, los escolans deuràn resòlvre de multiplas enigmas, obrir de cadenats, deschifrar de còdis e de messatges per tal de trobar lo mejan de s’escapar. Lo jòc es dividit en doas partidas, jogablas de faiçon independenta, de 45 minutas caduna, e s’adreça a un grop d’un desenat d’escolans.
Se tròba a l’interior d’un cofret de fusta que conten entre autres afars de lunetas anaglifas, de lampas UV per legir los messatges amagats, una carta d’Occitània, de pichonas boitas verrolhadas de mantuna talha, e segur de documents. I a tanben una aplicacion dedicada que permet de validar las responsas e de progressar dins la resolucion de las enigmas. La partida pòt èsser supervisada per un adult que balha las doas envolopas d’« aviada » e de « fin » e transmet las informacions als jogaires. Mas se pòt tanben debanar en autonomia, en seguissent las instruccions del libret fornit.
Per prepausar lo jòc dins son establiment, lo professor aurà besonh d’una sala amb almens una o doas grandas taulas, per tal d’i poder pausar lo cofret e çò que conten, d’un accès a Internet per utilizar l’aplicacion del jòc e, pels escolans, de papièr e d’estilòs. Lo cofret de jòc serà mes a la disposicion dels ensenhaires dins las diferentas acadèmias. L’OPLO a tanben creat un kit de comunicacion d’utilizar dins l’establiment amb d’afichas, de fichas d’inscripcion, un libret d’acompanhament, etc.
Conven aicí de felicitar l’OPLO, òsca per aquesta iniciativa que deuriá encantar professors e escolans e que, se capita, inspirarà benlèu d’autras entrepresas dins la meteissa dralha. E bon jòc a totes !