D’ací quauques mes, que poderatz arretrobar un filme pro esperat sus ÒCtele, qui estó rodat au primtemps passat en plen còr deu Lemosin, deu costat deu vilatge de Germont, en Corrèsa. Du côté de Germont, atau qu’ei d’aulhors entitolat aqueth documentari a l’entorn de la vita e de l’òbra de la gran autora Marcela Delpastre.

Dab aqueth film, lo realizator Renaud Fély que’ns vòu prepausar un dialògue intime dab la hemna despareguda e la soa òbra poderosa. La Marcela Delpastre que viscó ua vita hòra convencions e virada de cap tau tribalh de la tèrra e la poesia, enter incompreension deus vesins e admiracion deus amators de poesias occitana e francesa. En efèit, quan estosse en plea accion sus lo tractor, la Marcela Delpastre n’avè pas pena ad arrestar la maquina tad emplear d’un còp de gredon un deus sons nombrós quasernets de poèmas en las duas lengas, a bèths còps mescladas, au grat d’ua inspiracion qui la vienè tocar dirèctament com si n’estosse lo medium.

Dens Du côté de Germont, Marcela que’vs serà contada per familha, vesins, amics, e especialistas de la soa literatura tan abondanta, au briu d’un viatge dens lo temps, los paisatges, los testimònis e los mots, devath la guidança deu Jan dau Melhau, eretèr de la soa òbra.

Lo documentari, dejà difusat en abanspurmèra en quauquas salas de cinèma, i bèthlèu disponible sus octele.com, qu’estó coprodusit per Pyramide Production e ÒCtele dens l’encastre deu son contracte d’objectius e de mejans (COM) dab la Region Navèra-Aquitània.