Muscles amb d’espinacs
Es un plat provençal que se tròba tanben en Lengadòc. Es una caçòla de muscles e d’espinacs amb una mena de salsa blanca.
Ingredients
1 kg de muscles
1 kg d’espinacs
2 escaluènhas
de formatge raspat (parmesan, gruièra)
60 g de farina
sal e pebre
òli
Preparacion
D’en primièr, metrem los muscles dins una ola tampada e sus fòc suau. D’aquel temps, metrem una autra ola amb un pauquet d’aiga sul fòc, salarem e quand bolhirà, i metrem los espinacs. Quand los espinacs auràn pres un bolh, los colarem e reservarem l’aiga. Puèi pelarem e picarem las escaluènhas. D’aquel temps, los muscles se seràn dubèrts, los passarem pel colador e gardarem l’aiga. Tirarem los muscles de las valvas e aniràn dins un plat. Talharem a pro pena los espinacs. Dins una padena sus un fòc doç, farem rossir las escaluènhas e i ajustarem la farina que farem rossir tanben, sens arrestar de remenar amb lo culhièr de fusta. Alara i ajustarem l’aiga dels muscles e la dels espinacs ; siá en tot mai o mens tres quarts de litre. Remenarem fins que prengue un bolh. I metrem los muscles e los espinacs, salpebrarem e abocarem tot dins una caçòla de terrissa. Un còp cobèrt de formatge raspat, enfornarem a 200°. Un còp daurat, portarem lo plat en taula.
Variantas
Se pòt far tot a la padena e sens formatge. D’autres càmbian l’aiga per de lait o de vin blanc o los dos. D’unes farcisson los muscles amb los espinacs, d’autres encara ajustan de pan raspat per melhor gratinar. S’i pòt metre de nose muscada o un pauc de safran.
