Seleccionar una pagina

Lo Magazina

0 |

Duèl provençau, trilogia marselhesa (Edito del Diari n°78)

Cobèrta de Lo Diari n°78

Duèl provençau,
trilogia marselhesa

Quand aprengueriam qu’en 2024 s’organizarián de causas a l’entorn de Marcel Pagnol, 50 ans tot bèu just après sa mòrt, aquò alumèt quauquaren dins nòstre esperit. Teniam un exercici de talha : per lei Provençaus e mai largament aquelei que parlan occitan, Pagnol pivèla e taravèla. Lei questions si butassan : Pagnol nos representa ò nos caricatura ? Lo fau presar ò aborrir ? Coma si pòu èstre au còp popular, provençau e academician ?

Sus aquelei reflexions, nos fau un contributor (Camille Martel, aquí remerciat) per nos ramentar que son tanben lei 40 ans de Massilia Sound System, grop occitan emblematic de Provença e que, bessai… Pagnol… Massilia… esperatz… i auriá pas un liame entre aquelei figuras ?

L’exercici de talha ven d’ample. Siam dins la classa dau mèstre de paire dau Marcelon, clinats sus nòstre burèu d’escolan e nos fau sortir 36 paginas de literatura comparada. Provença, lei clichés, lei representacions e seis evolucions… e, mai que mai, lo desvirament de la maquina, lo reversament d’estigmata, la reapropriacion culturala, tant en literatura coma en musica ò cinèma…

Tot si mete en plaça, sostat per de convidats chausits : Massilia e Manivette venon festejar seis anniversaris en companhiá dau Louis Pastorelli de Nux Vomica ; Karin Hann cònta sa passion per l’òbra escricha de Pagnol ; Christian Philibert tòrna sus son istòria dei prejutjats pegats ai Provençaus ; Médéric Gasquet-Cyrus tòrce lo còu a quauqueis idèas lingüisticas reçaupudas.

Lo tablèu seriá pas complèt sensa lo trabalh requist de totei lei contributors que comprenon leis enjòcs e venon noirir la reflexion, siegue dau latz Pagnol, siegue dau latz Massilia, ò lei dos.

Es ben encapat l’exercici dau doble retrach crosat ? Ma fista, veiretz !

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Danís Chapduelh

Perigòrd d'origina vivent a Tolosa aprèp un passatge a Bordèu, mas d'èime panoccitan, oficii coma cap-redactor del Diari a la seguida de Sebastian Pugin, qu'ensagi de contunhar son òbra. Ai una formacion en letras, en lenga occitana e en projèctes culturals, tanben en comunicacion, webmastering e evenimencial. Soi curiós de tot çò qu'es creacion, encara mai s'es en ligam amb la lenga occitana, e s'estimi melhor daissar parlar los autres e jogar lo "Mossur Leial" en colissas, me veiretz d'aicí e d'alai signar qualques articlons, en defòra del tradicional edito, sus de subjèctes variats. En mai del Diari soi cargat de mission sus d'autras accions de l'Institut d'Estudis Occitans de la Region Miègjorn-Pirenèus qu'o edita, e fau tanben d'autras causòtas a costat.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.