Preparacion

D’en primièr farem còire las patanas dins un pairolat d’aiga sens las pelar. Salarem, e daissarem còser a fuòc suau. Quand seràn còitas, las tirarem dins un plat, escamparem l’aiga e pelarem sièis grans d’alh que picarem dins lo mortièr. Talharem lo formatge a finas lescas. Pelarem las patanas e las passarem per l’escrachapatanas. Aquela purèa la daissarem sul fuòc suau e i ajustarem un culhierat de sahin, puèi la burrada (o ben de lach). D’ara enlà cal remenar amb la culhièra de fusta tot en ajustant lo formatge talhat. Cal remenar sempre dins lo memes sens amb la culhièra de fusta, i ajustar l’alh e remena que remenaràs fins que l’aligòt fiale. Cal remenar vigorosament sus un fuòc plan doç fins que l’aligòt s’estire de mai de mièg mètre. Ara lo cal servir !

L’aligòt se pòt manjar amb una ensalada mas acompanha plan la salsissa a la brasa o un rostit de buòu o de vedèl.

Variantas

La burrada pòt èsser remplaçada per de lach. Lo grais pòt èsser d’òli de noses, d’òli d’oliva, de grais de guit o de burre. A la Planesa (Auvèrnha), n’i a que càmbian lo lach per de bolhon. Al Causse de Severac (Roergue), n’i que i meton una lesca de ventresca o de cambajon rostit. A Chaldasaigas (Aubrac), fan tanben l’Aligòt flambat ; en plaça d’alh, i meton de sucre e acabat, l’asagan de ròm e lo flamban.