Seleccionar una pagina

Clic & Scroll

0 |

La Minutina

Avètz una minuta ?

La minuta permet de mesurar lo temps, mas tot aquò, o sabètz, es relatiu. Una minuta, per acabar de s’aprestar e mancar pas lo bus, es cortet. Alara qu’una minuta per esperar la mesa a jorn del telefonet sembla una eternitat. Avèm totes una minuta de pèrdre, mas la màger part d’entre nosautres l’anam pèrdre a jogar a Candy Crush o a fintar de fòtos sus Instagram.

Una minuta es lo temps que cal a un adult per legir 300 mots, es lo blòg minutinas.org que comença sa descripcion amb aquela informacion. Prepausa de tèxtes en occitan de legir en una minuta, las « minutinas » alavetz. Son poeticas, plasentas o satiricas. Mantuns dialèctes e grafias i son emplegats, es de bon legir, per exemple en esperant lo bus.

Las minutinas nasquèron l’an passat dins la revista en linha jornalet.com, abans de venir un site independent. Èra una mena de concors, ganhat per lo Pèire Tommasi e son tèxte La Guèrra dels Clans, una joiosa satira del movement occitanista. Son ja un quinzenat de contributors, demest los quins Pascale Respaud e son agach poetic sus Arièja, o Laurenç Trobat amb sa faula amorosa 2.0.

D’unes an de messatges politics de passar, d’autres d’istòrias de contar, e d’autres encara venon per la galejada. Òm se pren pas al seriós, aquí es un afar de convivialitat. Minutinas.org es un espaci d’expression en occitan, contemporanèu e unic. Lo site pretend pas revolucionar la literatura, mas sonque prendre de plaser a jogar amb los mots d’òc.

Demòra coma un perfum de tradicion trobadoresca, que de contributors se respondon per poemòts interpausats, dins un ambient respectuós e amistós, solide. Es un biais ludic d’abordar la lectura e l’escritura. Se sentís una volontat de democratizar e estimular la creacion en occitan.
Cadun pòt menar sa pèira a l’edifici. Aquí se crosan d’autors confirmats e d’amators. Es dobèrt a totes, basta de conéisser la lenga, e se legissètz aquesta cronica, la sabètz ! Çò primièr, lo site vos convida de mandar lo vòstre tèxte, aquò interpèla. Nos pausam la question : « Ne soi capable ? ». Las minutinas butan a gausar s’exprimir en occitan.

La minutina es una invencion del Joan-Marc Leclerc, un artista polimòrf que coneis la dança entre las letras e lo temps. Es l’autor d’un roman, d’un diccionari de rimas, de pèças de teatre, de cançons e d’articles de premsa : lo paire de las minutinas es un activista per la lenga d’òc que, per mantunas vias artisticas, sus l’empont o darrièr sa pluma, ensaja tostemps de partejar simplament son amor de la lenga.

L’artista nos menèt ja per una aventura occitana temporala en 2015 amb Òc Around the Clòc, 24 oras de tira d’espectacles en occitan a l’Ostal d’Occitània de Tolosa, pròva un còp de mai aquí que ne manca pas, d’idèas per far bolegar e treslusir la lenga nòstra. E se l’idèa de la minutina vos estrambòrda, podètz mandar la vòstra d’un solet clic sur la pagina d’acuèlh del blòg.
Minutinas.org es coma una boita de chocolats, un còp dobèrta, qu’òm se pòt pas arrestar d’i picar dedins. N’i a de totes gosts e quitament de talhas diferentas. Lo Joan-Marc Leclerc, que se ditz « puncàs retirat » dins una de sas cançons, pensèt als refractaris amb de biminutinas (2 min) e de sesquiminutinas (1 min 30), a recampat tanben qualques tèxtes fòra format. S’i tròban d’unas polidas excepcions a la règla.

S’avètz una minuta de pèrdre, veiretz pas lo temps passar !

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.