Seleccionar una pagina

Supereròis

0 |

L’article que ne’n setz l’eròi

Per queu Diari ludic, vos voliá prepausar de vos menar coma me dins una aventura epica. Munissetz-vos d’un dat, d’un gredon e d’un bocin de papier, e començatz la lectura de quel article que ne’n setz l’eròi o l’eroïna.

1

Davant de començar, vos fau vos trobar un chafre que peta, que fotrà las paurs a tota la canalha de la vila de Limòtges e mai daus alentorns. Notatz-lo en naut de vòstre bocin de papier. Puei, vos fau demandar a vòstra neboda o au filh de la vesina de vos dessenhar un costume colorat, que rebatrà vòstre caracter mai vòstre chafre. Puei vos fau determinar lo niveu de las caracteristicas de vòstre personatge : Punt d’Adreça (PA) e Punt de Fòrça (PF). Per quò, lançatz lo dat e notatz la valor obtenguda.

Aura l’aventura comença au paragrafe n°2.

2

Après daus quilometres de marcha dins de las galariàs jos la vila de Limòtges, setz davant mon repaire secret. « ‘Chabatz d’entrar ! Ai una mission plan importanta per te. Te fau neutralizar Cervelax, una intelligéncia artificiala maufasenta que vòu préner lo contròle de tots los sistemas electronics dau monde. Ai tròp de trabalh emb la Chaça Volanta mai Leberon. Adonc, me fau de l’aida. Mercés de te’n charjar. Veiquí l’adreça ente l’ai localizat. »

Rendetz-vos au paragrafe 3.

3

Davalatz dau bus n°20 dins la Zòna Industriala Nòrd de Limòtges. Setz davant un bastiment abandonat. Dedins, de las lumieras clinhòtan d’un biais estranh. Entratz. Setz au mitan d’un long corredor emb una pòrta a chasca extremitat.

Per la pòrta de drecha, anatz au paragrafe 4.

Per quela de mança, rendetz-vos en 6.

4

Dreibetz la pòrta e davant vos, lo voide ! Anatz tombar de 4 metres e vos esbolhar sus lo sòu d’un angar desafectat o trapar la punhada de la pòrta e evitar una mòrt umilianta ?

Lançatz lo dat e ajustatz vòstres PA au nombre obtengut.

Si la resulta es egala o superiora a 7, tal un acrobata, vos viratz e sautatz dins lo corredor.
Anatz a l’autra pòrta en 6.

Si la resulta es inferiora, vos esbolhatz lamentablament.
Rendetz-vos en 5.

5

Vos desvelhatz dins un liech de mon repaire, un tube dins lo nas. « T’ai retrobat davant que mueras. Dins quauques jorns, podràs tornar combatre lo Mau ».

Tornatz en 3.

6

Vos retrobatz dins un autre corredor emb una autra pòrta. Davant quela-quí, vesetz un robòt qu’a de las mitralhetas en plaça daus braç. Devetz engatjar lo combat !

Lançatz lo dat e ajustatz vòstres PF au nombre obtengut.

Si la resulta es egala o superiora a 7, un rai lasèr suert de la manja de vòstre costume e vòstre adversari explòsa.
Podetz entrar dins la peça seguenta en 7.

Si la resulta es inferiora, las balas dau braç-mitralheta robotic trauchan vòstra peitrina.
Rendetz-vos en 5.

7

Au fond de la peça, vesetz un ordinator gigant : Cervelax ! « Qui ses, te ? Qu’es lo Capitani Lemosin que te manda quí ? Jamai m’arrestaretz ! Prendrai lo contròle de tots los malhums informatics, electronics e mai sociaus e l-i publicarai tot çò que voldrai ! Degun mai se mocarà dau beu Cervelax ! » Sautatz sus lo clavier de quela machina infernala. Saubretz trobar lo còdi que la tua ?

Lançatz lo dat e ajustatz vòstres PF au nombre obtengut.

Si la resulta es inferiora a 7, lo clavier vos electrocuta quand pausatz los dets dessús.
Anatz en 5.

Si avetz obtengut 7 o mai, Cervelax crasena, fuma e se tua.
Victòria ! Avetz sauvat lo monde !

close

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Capitani Lemosin

Lo Capitani Lemosin es un supereròi plan de chas nautres, que viu 'captat dins un repaire secret, au mitan dau malhum de galariàs que s'espand jos la vila de Limòtges. Son subrepoder ? Tot saber sus sos cosins americans, conéisser los bons plans en comic-books, serias e filmes de supereròis e ne'n far profitar lo monde, entau, per la sola beutat dau geste.

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Lo CalenDiari

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

Los darrièrs clips

Cargament...