Seleccionar una pagina

Barrutlatges

0 |

Mauvesin, Nauts Pirenèus : Lo castèl de l’Escòla Gaston Febus

L’esquina dels Pirenèus desplega son sèrre blanc al sud, s’enauça al cèl amb la punta peirosa del Puèg del Miegjorn de Bigòrra, e teis un ligam, una rota de las cimas que fila, a l’èst, cap a las nautors d’Arièja. Es la rota que mena a Foish, al còr del terraire de Gaston Febus, lo senhor montanhòl, independent, fina lama, cap politic e òme de letras, autor de cançons trobadorencas e del Libre de caça(1).

Sèm aicí sus una còla, una illa dins la mar verda entre Lanamesan e Banhèras. Una illa dins l’espaci e dins lo temps, un punt d’ancoratge benlèu, una amira. Aquel pòrt al bèl mièg de las tèrras quilha coma un refugi las parets nautas e largas d’un castèl poderós : la plaça fòrta de Mauvesin. Nòstre barrutlatge, uèi, nos mena al caireforc de l’Istòria, entre Edat Mejana e volontat fonsa d’aparar lo patrimòni, de servar las pèiras mas tanben, e subretot, de servar l’agach que pòrta luènh. Mauvesin es, primièr, un panorama, una vision a 360°. Mauvesin es, avant tota causa, un centre, un embonilh per abraçar l’espandi. Lo castèl es proprietat de l’escòla Gaston Febus que lo restaurèt dins lo respièch de sa bastison medievala e nos liura, ara, un testimoniatge concret de l’arquitectura defensiva miegjornala del sègle 14. Es l’ancian cònsol de Masseube (Gers), Albin Bibal, que lo crompèt e lo donèt, puèi, en 1907 a l’Escòla.

1 – Coneissèm una cançon en òc, Aras can vey del bon fuylar la rama, de Gaston Febus e lo sieu Livre de Chasse redigit, el, en francés.

La visita (que se pòt far en occitan) es estonanta, tan l’edifici impausa sa siloeta massisa. Lo donjon, de 37 mètres de naut, es l’òbra de Gaston Febus que faguèt de Mauvesin una pèça mestressa per aparar son territòri pirenenc. Dins l’encencha, un trabalh de reconstitucion istorica permet de descobrir tanben las maquinas de guèrra d’epòca, coma lo famós trabuquet e autras catapultas… Mai lo tresaur es subretot literari, darrièr las muralhas de Mauvesin s’escond la bibliotèca de l’Escòla Gaston Febus que recampa un fons bigordan, bearnés e, mai largament, en lenga d’òc, catalan, francés, espanhòl.

La bibliotèca es dobèrta a totes e maites obratges foguèron numerizats. Pròchi, sus la comuna de Bonamason, se tròba un autre luec d’importància : l’abadiá d’Escaladiu. Una escala, justament, sus lo camin de Dieu, un pas devèrs lo Mistèri o, tot simplament, una pausa, un temps de repaus, sus lo camin dels pelegrinatges. L’abaciala es famosa per l’armonia aquitecturala de sas proporcions, es reputada per la qualitat sonòra qu’i regna, propícia a l’experiéncia fisica del cant. Sos corredors de pèira dobrisson sus un exterior plantat d’aubres centenaris, rores e faus mandan sas mans de lenha cap a l’asuelh ennevat de las montanhas, sempre presentas, nautas escalas que menan, de l’autre latz, en Aragon. De’n pertot las aigas davalan : los rius Garravet, Lèna, Aiga Cauta, la ribièra Arròs carrejan los còdols arrancats a las cimas e nos convidan a d’autras caminadas d’auturas. La Torre de Mauvesin, ela, coifada del drapèl sang e aur, escota passar lo vent.

A prepaus de l'autor

Silvan Chabaud

Silvan es redactor al Diari, òc, mas carga mai de casquetas qu'aquela : jol nom de "Chab" canta dins Mauresca (Fracàs Dub) dempuèi la creacion del grop en 1999, e tanben dins Doctors de Trobar, doas formacions que fan sentir qu'es lo Massilia Sound System que lo faguèt cabussar dins l'emplec vivent de la lenga occitana. La lenga la maneja d'alhors tant que publiquèt un recuèlh de poesia, "Leis illas infinidas / Les îles infinies" (Jorn, 2012). Enfin, Silvan es universitari, autor d'una tèsi sus Bellaud de la Bellaudière, poèta provençal del sègle XVI e actualament cargat de corses a la facultat Pau Valèri de Montpelhier.

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !