Nissa Sound System

Faire la tièra dei antagonismes tra Marselha e Niça seria una obra dont mi lancerai pas, pura lu ligams son importants despí esquasi 40 ans. E per n’en parlar, qu de mai ben plaçat que Louis Pastorelli ? Artista plastician ma finda un dei paires de la musica mòderna occitana à Nissa, lo cantaire de Nux Vomica e Gigi de Nissa, un dei creators dau Carneval Independent de Sant Ròc, a pilhat un pauc dau sieu temps per respòndre ai nòstri demandas.

A la fin dei annadas 80, Janluc Sauvaigo m’avia fach escotar una caisseta de Massilia Sound System. Coma lu volia faire venir à Nissa per un concèrt, m’avia demandat d’ajuda e lu avii aubergat a maion. Avii embé ieu de gents qu’emplegavon lo provençal a la sieu mòda e d’un biais actual. Avèm simpatizat mas en aquesta epòca, eravam en una dralha qu’avion pas. Eravam pintres, aviavam dubert lo Hangar-Sant Ròc au mitan dau nòstre quartier, dont aviavam installat lu nòstre atalhiers. Aviavam creat un carneval populari e voliavam aver una musica nòstra. E lu Massilia n’a donat de solucions. Èran un sound system e cantavan donca embé de maquinas, èra la solucion qu’aviavam da besonh. Èra pròpi complicat de trovar de musicians, volian pas faire la nòstra musica, e nautres, sobretot, voliavam pilhar la paraula. Eravam pròpi en l’escambi emb’elu, es per aquò que cau pas estaire embarrats. Si siam identificats, aviavam lo meme rapòrt a la cultura, a la pintura, au cada jorn. Pi avèm rescontrat lu tolosencsLu Fabulous Trobadors, pi plus tardi BerardoSergio Berardo de Lou Dalfin dei valadas occitanas o encara lu catalans e meme lu artistas dau Brasil. Avèm totjorn escambiat embé de gents qu’avian li memi preocupacions culturali, d’una cultura pas centrala. Au Brasil, Rio o São Paulo son diferenti dau Nordest. E ieu, capissii pròpi ben aquò perque vivii la mema cauva embé la cultura nissarda.

Un sosten a nòstre travalh, la creacion d’una ret, pi una solucion tecnica. Dau bòn, arribavi pas a trovar de musicians, e pi faiavam pas de jazz o de ròck. Aqueli maquinas correspondian a una avançada tecnica, èra l’epòca dei samplers finda. Mai qu’una musica, podiavam crear un univers sonòre, un agach un pauc tecnic per aver de solucions per existir. Es un mejan que n’a ajudat a un moment e avèm pi començat a ajónher d’instruments, coma lo sublet, per umanizar li maquinas. N’an aportat tanben una maniera de dire li cauvas, en lo lengatge, tornat descurbir quauquaren que nen correspondia en l’escritura, lo carnavalesc. En rapòrt au drama de l’escritura francesa, eravam mai en la satira. Mai que Massilia, avèm trovat una estructura, Mic-Mac, que capissia la nòstra idea de cantar en òc. Son elu que n’an ajudat a trovar de concèrts, que degun n’a jamai ajudat a Nissa. Quora cantavam en nissart, passavam o per de folklo, o per de facho, avèm deugut si batre.

Pi avèm començat a s’organizar, e en li regarjant, avèm fach lu nòstres premiers CD, avèm poscut aver una pichina autonomia financièra. An organizat una grana tornada finda, Occitania qu’es aquò, embé la Talvera, Gacha Empega…