Los Òmis Petits
Los Òmis Petits
Terèsa Pambrun
Edicions Lètras d’Oc
Colleccion Camins
Illustradas per las aquarellas
originalas de l’autora
Literatura joenessa
a comptar de sheis ans
32 paginas
Prètz : 16€ (Libe solet)
19€ (Libe + CD )
Terèsa Pambrun
Avetz ‘ja entenut a parlar deus òmis petits ?
Sabetz, aqueths que viven dens los bòscs, entre « cabiròlas e esquiròlas, parpalhòlas e pamparòlas, macòlas e claveròlas, hauguèras e vidauguèras, còths arrois e ausèths blus, gahús e tinhahús, damisèlas e carbonèlas, camparòlas e aveteròlas, barbudas e èrbas hiludas… »
Tots vestits d’arroi de la mòda vielha e cauçats d’esclòps d’argent, que pòrtan lo peu long e la barba de qui tòca en tèrra, a pena se son grans com un dit los òmis petits…
N’i a que disen que son eths de qui cambian las causas de plaça, que hèn carrasclejar las pòrtas, que chebitejan las istòrias amagadas e las cantas petitas pendent la neit quan tot a l’entorn qu’ei mut…
Vertat que son un chic trufandèrs los òmis petits, mès, coma entà’s hèr perdonar, que son eths tanben que ns’aidan tà tornar trobar las causas quan e’ns cagen de las pòchas e que las perdem dens nostas passejadas peus bòscs en botar-las en evidéncia au bèth miei deu camin…
Per’mor lhèu « Que saben tot de la vida e deu temps qui ns’escapa », a nosauts praubes umans ne’us sabem pas mes véger ni escotar…
En temps vielhs que vivèvan enas nòstras maidons, e vivèvam amassa en bona companhia, mès un dia qu’avem deishat d’i créger, e despuish ne’us vesem pas mes, per’mor que son un pauc com las hadas los òmis petits…
Mès, qui sap, se’vs passejatz la neit deu cap d’an dens los bòscs, sense hèr nat brut… que’n crotzaratz un tot concentrat aus sués ahèrs, e lhèu alavetz que descobriratz lo secret deus òmis petits… E qui sap, lhèu qu’un dia, los òmis petits que tornaràn víver en armonia dab nosauts coma dens los temps vielhs…
Darrèr obratge de l’autora haut-pirenenca publicat en çò de Lètras d’òc, aqueth conte accessible entaus mainats a comptar de sheis ans qu’ei illustrat dab las aquarellas originaus de Terèsa Pambrun. Coma las darrèras publicacions d’aquera colleccion, lo libe qu’ei acompanhat d’un CD que’ns permet d’audir la mesa en votz deu conte peu celèbre autor Joan-Loís Lavit. Qu’auratz tanben lo plaser de trobar aqueth conte dens la sua version lengadociana, « Los òmis pichons » dont la revirada ei estada hèita per Sèrgi Carles e de qui ei acompanhada deu CD entà escotar la sua lectura.