Los hialats sociaus
Imaginatz que 20 ans a, los hialats sociaus que començavan tot just d’existir. Uei, que son pertot. Quaus son los lors impacts dens las nostas vitas ? Que’vs perpausam un estat deus lòcs dab los nostes uelhs de liceans.
Los hialats sociaus que son un utís de comunicacion e de partatge numeric. Que permeten d’escambiar informacions, de communicar, de partatjar fòtos e vidèos. Uei, lo nombre d’utilizators qu’ei en trin de gahar la volada : que son 52,60 milions1 suus hialats sociaus en França, sia lo 80,3 % deus poblants. Que hè paur, non?
Mes quin hialats sociaus ? Tà qui ? Tà qué ? Sondatge !
Taus 9 – 11 ans
Los mei joens qu’an ua bona coneishença (a còps un drin tròp) deus hialats sociaus. La frequentacion qu’ei cambiadissa segon las educacions : que pòt totun anar dinc a mei de duas òras per dia. Mes qué i hèn ? La principau activitat qu’ei d’espiar videòs (YouTube e TikTok) e d’enviar messatges (Xooloo). La màger part qu’a consciéncia deus dangèrs que representa : secutament, imatges dangerós… Los pairs e mairs que contròlan l’utilizacion deus hialats e ua sensibilizacion qu’ei prevista dens lo programa escolar.
Adiu Anna ! Quin atge as ?
14 ans
Ès inscriuta a hialats sociaus ?
Òc, Snapchat, Insta e YouTube
E’us consultas sovent ?
Òc, u òra e mieja cada dia
Qu’ei çò que t’apòrta ?
Arren, que hè passar lo temps. A còps YouTube qu’ajuda taus cors.
Taus 12 – 18 ans
Nat dobte, los hialats sociaus qu’impactan las loas faiçon de víver, d’estar e d’interagir. L’utilizacion deus adòs qu’ei excessiva : haut o baish quate òras per dia e tà quauques uns mei de sèt òras.
« La purmèra causa que hèi quan me lhèvi, qu’ei de’m préner lo tefefonet tà espiar las notificacions »
David, 18 ans.
Un gèste automatic tà la màger part deus joens. E tà vos ?
Que son unamines, l’utilizacion deus hialats sociaus qu’a gahat la volada despuish lo confinament : besonh de demorar en contacte dab los amics, de s’assabentar de las nautats,…
Qu’ac vedem, los adòs que son gahats peus hialats. E òc, qu’ac arreconeishem !
Taus 25 – 40 ans
La màger part deus adultes que tròban que los hialats sociaus son un utís tà guardar un uelh actiu sus l’actualitat, assabentà’s e demorar en contacte dab pròches. Un gran nombre que pensan tanben qu’ei ua pèrta de temps.
Qu’ac tornam díser : los hialats sociaus que son vaduts a la fin de las annadas 90 dab MSN, Windows Live Messenger, Myspace, los blògs. E’vs parla tot aquò ? E òc, Mark Zuckerberg n’ei pas lo purmèr trobaire.
Ua màger part n’an pas pravat dab eths.
« Au licèu, daubuns qu’avèvan un MP3, alavetz que’u nse prestavan tà escotar e escambiar musica. Qu’èran los nostes hialats sociaus »
Emilie, 33 ans.
Los mei utilizats : Snapchat, Facebook, Instagram.
Cò que podem véder, qu’ei que los hialats sociaus que contunhan de borbolhoar e de s’adaptar a las demandas deus joens. Mes, quinas son las limitas deus hialats sociaus ? E pòden estar un dangèr dens la nosta percepcion deu monde ? De si medish ?
D’après un sondatge realizat entermiei los escolans deu noste establiment escolar
Sorgas :
Los liceans d’Aigon
(Mattias Jaegger, Justine Loustau, Alicia Monrepos, Matéo Pujo e Anna Theamus)
