Lo super-retrach : Miss Marvel

Nascuda a Jersey City dins la Nuòva Jersey, Kamala Khan es un dròlla musulmana de 16 ans, d’origina paquistanesa. Son frair es plan conservator, sa mair a paur que venha gròssa per çò d’un dròlle tròp ardit e son pair vòu que venha medecin. Au liceu, sos amics son Nakia, filha d’immigrats de l’Asia dau Sud coma ela, e Bruno, d’origina italiana, emb lo quau partatja la passion de la seria Las Tortujas Ninjas. S’enamora de Kamran, un jòune que li apren a menar. Fan incondicionala de Carol Denvers aliàs Captain Marvel, a lo poder d’eslonjar son còrs. Per exemple pòt agrandir sa man per sauvar Zoe, la filha blonda e populara de sa classa que l’agaça mai que mai. Segon las fonts (seria o comics) sos poders venen d’un braçalet eretat d’una reirgranda non-umana o de son passatge dins una bruma terrigena.

Sas creatritz, Sana Anamat e Gwendolyn Willow Wilson, totas doàs musulmanas e originàrias de la Nuòva Jersey, volián crear un personatge que permetriá a totas las dròllas de s’identifiar. Sana Anamat fuguet confrontada au racisme antimusulman dins sa jounessa dins las annadas 90 e voliá presentar un personatge musulman positivament, per « que la prochana generacion coneissa pas queu tipe de reget d’identitat ». G. Willow Wilson, ela, li voliá pas balhar daus poders minhards e luquetejants mas quauquarren de cinetic, bizarri e amusant de veire. Tanben voliá quauquarren de liat a l’adolescéncia. « Nos sovenem tots d’aver ‘gut 16 ans e de pas nos sentir a nòstra plaça dins nòstre còrs. Aver daus membres que frotjan a daus ritmes diferents, qu’es un combat au quau nos podem tots identifiar ». Qu’es tanben sas aventuras que corresponden a la vita d’una jòuna d’aüei. Deguet trobar l’equilibri entre sauvar lo monde emb los Avengers e estudiar, veire los amics, complir sas obligacions familialas tant coma vautres devetz far emb lo liceu, l’espòrt o la musica, los estagis mai los pitits trabalhs de l’estiu.

2022 fuguet l’annada de Miss Marvel. Disney surtiguet una seria sus l’eroïna emb l’actritz canadopaquistanesa Iman Vellani dins lo ròtle principau. E sas aventuras contunhan dins lo filme The Marvels. Panini Comics ne’n profechet per tornar surtir quauques comics. Entau la podetz retrobar dins la seria Marvel Next Gen : Ms Marvel (dos tòmes mai un fòra seria) e dins un tòme de la seria Marvel-Verse que li es dedicat.

Vos soate de passar daus bons moments de lectura o davant un ecran beu o pitit en companhiá de Kamala, e mai de segre las aventuras d’autres superjòunes !