Seleccionar una pagina

Dorsièr

0 |

La concòrdia de Discord

Discord es una aplicacion que monta. Es a mand de ringardizar de monuments tals coma Skype, WhatsApp o TeamSpeak. Nasquèt en 2015 amb las comunautats de gamers, e pauc a pauc evoluïguèt, s’enriquiguèt de foncions de mai en mai socialas per acabar per sedusir un brave public. S’i tròban ara tota mena d’espacis, dins totas tematicas.

Lo grand bom de Discord data del confinhament de març de 2020, que de liceans, d’estudiants, de còps los professors, s’i retrobèron pr’amor d’una eficacitat que mancava a las plataformas utilizadas fins aquí, e qu’amai se trobèron saturadas.

Dempuèi, la popularitat de l’apli acaba pas de pujar. S’i trapa l’esperit dels forums o dels grops Facebook, mas amb un fum de foncionalitats de mai. Podètz fargar lo vòstre espaci (servidor) e lo dividir en salons de discutida, çò que permet de conversacions ordenadas e legiblas. Çò sedusent es de poder escambiar pasiblament entre apassionats d’un meteis subjècte.

E l’occitan dins tot aquò ? Solide que nos interessam pas a Discord per azard, s’i retròban tot un fum d’amoroses o de curioses de las lengas e culturas minoritàrias. Alavetz, l’occitan i ten sa plaça. Un servidor ric de gaireben 400 membres atirèt particularament la nòstra atencion, se ditz Nòstre País. Es pro actiu e sos membres sortits d’Occitània e Catalonha mas tanben d’Euròpa tota e d’America, forman una gaujosa comunautat de l’anèl en quista de saber e de convivialitat. Per una màger part, son de liceans o d’estudiants, de totes nivèls de lenga e de totes nivèls d’interès per l’occitan. E solide, i crosam tanben de rainals mai vièlhs ; tot aquel monde parteja de coneissenças linguisticas per aicí, de vidèos, de ligams e de memes per ailà. Òm s’ajuda, òm s’encoratja e òm galeja ! L’ambient es totalament destibat. S’i pòt parlar, sens se prene lo cap, de la diversitat de la lenga, de sas grafias, de sos dialèctes, de sas escòlas de pensadas ; de subjèctes que, sus Twitter o Facebook alucarián lo fuòc de polemicas sordas. Aquí lo « trollatge » es pro mestrejat, que l’apli marcha per invitacion, e dispausa de fòrças aisinas de moderacion.

En defòra d’aquò, s’i parla tot simplament de tot e de res, « del temps que fa », coma diriá la grand. Es aquò qu’agrada a Loís Gavrós, estudiant a Malta e menaire del servidor. A capitat de fargar una comunautat internacionala d’occitanofònes e de curioses qu’escàmbian cada jorn en occitan. Resumís aital l’esperit de Nòstre País : « aprene e parlar ». Basic. Luènh de tot canal oficial, aquel espaci e sos parièrs, los servidors Occitània, Nòrd-Occitans o encara Juòccitan, son a fargar un « occitan liure », una lenga populara e descomplexada.

De long del sègle passat, l’occitan es estat torn per torn sacralizat, politizat, mespresat, e a l’auba d’aquel millenari, se prediguèt sa mòrt, fauta de visibilitat dins l’espaci public. La democratizacion del wèb càmbia los rapòrts, e Discord n’es una pròva de mai. Los gigants de la Silicon Valley, e mai foguèsson criticables sus plan d’aspèctes, an donat d’aisinas e de possibilitats que los afogats de l’occitan se’n apoderèron sens far tira-mòla. Quand las institucions penan totjorn a far créisser l’usatge de la lenga, d’anonimes sul wèb avançan… e benlèu sens o saber.

Version audio :

la concòrdia de Discord

per Votz | Lo Congrès permanent de la lenga occitana

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !