Seleccionar una pagina

Omenatge

0 |

Adiu Peir

Adiu Peir

Que s’ei mort Peir Lobèra. Au cap d’un camin tròp brac. Ua vita dedicada au collectiu, ua vita de militant. Militant sindicau dab un engatjament en SGEN-CFDT. Militant politique qui miè campanha devath de la bandièra d’Entau País. Militant culturau engatjat en mantuns moviments occitans.

Peir, un occitan abans d’estar un occitanista. En cadun deus lòcs de combat que’s portava en davant coma l’occitan qui èra. Qu’ei atau qui a, dab d’autes camaradas, escadut a hèr deu SGEN-CFDT, lo premèr sindicat de las Hautas-Pirenèas a préner en compte la defensa de l’ensenhament de l’occitan. Un sindicat qui arrevendica uei d’estar « eth sindicat de nosta », coma escrivut suu son siti internet. Qu’estè delegat deu SGEN au CESR de Mieidia-Pirenèus e que contribuè, au briu de las suas intervencions e deus desbats aquiu a cambiar las arrepresentacions culturaus impausadas peu centralisme francés. Qu’èra tanben un òmi de conviccions, dab qui e calè longaments batalhar e desbàter, dab qui mantuns e’s son tumats. Que calè aver arguments agusats e solidaments piats entà ganhar la soa ahida.

Pr’amor Peir, qu’èra un òmi de cultura. Ua cultura imménsia. Òmi deus libes, dab ua bibliotèca personau impressionanta. Que’us avè leguits tots, que’us sabè tots e, quan nse trobàvam a loa, ua capacitat estomaganta a anar pescar immediataments en sué milierat de libes la citacion qui volè tornar trobar dab precision. Mes tanben, òmi banhat dens l’oralitat gascona. Qu’ei hidant-nse aus sons arguments qui, a la fin de las annadas 70, los occitanistas de Bigòrra e ns’anèm implicar dens la Hestejada de Bigòrra a contrabriu de las orientacions de l’epòca. E ben que nse n’a sabut.

Peir un occitanista. Present au moment de la creacion de la seccion despartamentau de l’IEO, « Nosauts de Bigòrra », qu’a hèit mostra d’ua fidelitat sense manca a l’Institut d’Estudis Occitans. Qu’a, sense pòsa, participat a la vita de l’IEO e que presidè l’IEO Mieidia Pirenèus, de 2012 a 2019.

Çò qui nse vòu mancar que son ailàs mes d’escriuts de la soa man qui serén poduts estar ua referéncia d’analisi. Totun que nse demoraràn longtemps a la memòria los sons pos de colèra (eth qui èra tant allergique a la coneria umana) mes tanben los sons esclaquerats d’arríder e de gòi.

Haut Peir !

A prepaus de l'autor

Joan Loís Lavit

Joan Loís Lavit es un ancian regent, puèi conselhièr pedagogic d'occitan dins las Nautas Pirenèas. Es uèi un autor màger de la literatura occitana actuala, e sap manejar mai d'un estile e mai d'un registre : roman, novèla, teatre, policièr, public jove o encara sciéncia ficcion.

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !