Era hestejada Trad’azun
Ne les coneishetz segurament pas, mès Monica e Robert ROUSSE son ar’origina d’ua associacion e sustot d’ua hestajada de mes en mes coneguda e de mes en mes importanta.
Enas Hautas Pireneas, cad’an, despuish 3 ans, que’s desbana ua hestejada de dança e de cultura tradicionala occitanas. Que d’e organizat per’associacion «En Cadence», qui compta 40 aderents e qu’existeish despuish 2013 mercés a eths, qui son passionats deras danças tradicionalas e donc qu’organizan talhèrs de danças eths dimenges totas eras duas setmanas, de 18h dinc a 19h30/20h, a Bun (65).
Ua deras loas activitats que d’e, tanben, er’organizacion dera hestejada TRAD’AZUN qui’s passa a Arrens Marsous (65) cad’an cap aost, debuta seteme. Que prepausan de bals a 10€ per un dia, 12€ per dus e per tres dias que serà 25€ ; d’estagis de dança, de cants e de musica : un dia que serà 12€ e 20€ taths dus dias ; e d’animacions gratuïtas com de visitas guidadas, de jòcs, de cosina… S’avetz mensh de 16ans, eras entradas aths bals que son gratuïtas ! A capsús, tot d’e previst, que podetz béver e minjar, que i a un restaurant dab repaishes confeccionats peths benevòls dab produits locaus, un repaish «normau» que costarà 10€, un «vegetarian» 8€ e un «mainat» 6€ ; e un estanquet dab bièrra artisanala locala. Qu’i podem encontrar tanben un petit mercat artisanau e hèra de bon’umor !
Totun, ua tala hestejada com’aquera que’s prepara tot eth long der’annada e que d’e pro complicat. Que cau regir eth budget, eras subvencions, eths grops qui seràn programats, eths menuts tanben, tot çò qui d’e logistica donc eras salas, eths capitèths e sustot era securitat dab eths secors. Eras reservacions deths estagis que’s devon gerir, tanben eras planificacions dab tots eths benevòls.
Un punt shens qui tot aquò ne serviré pas a arren, era comunicacion. Que cau hèr e imprimir eras afichas, eths paperòts e tanben comunicar suths hialats sociaus donc tad aquò, qu’existeishen 2 sitis internet, un per’associacion www.en-cadence.jimdo.com e un pera hestejada www.tradazun.jimdo.com. Aquiu qu’avetz totas eras informacions.
Aquest’annada, que’s passarà eths 30-31 d’aost e 1er de seteme. Ath programa, eth permèr ser, un bal a 21o dab «Bargainatt», e «Duo Baudoin» ; eth dissabte ara madeish’ora, «Duo Rivaud Lacouchie», e «Duobois e Cie», e fin finala, eth darrèr bal que serà a 15o eth dimenge dab «Verd e Blu», e «Sasisi Ardiak». Tot eth long dera dimenjada, eth grop «Lo Guit» que landerejarà e un salon de luteria que’s desbanarà eth dissabte e eth dimenge. Tanben eth dissabte a 15o, un concèrt de «Nat sei pas» d’e organizat, dab hèra d’animacions com jòcs, cosina dera còca ara bròcha, iniciacions, passejadas a Arrens e Aucun. Se voletz hèr d’estagis de musica, de cant, de dança, ne desbrembatz pas d’arreservar !
Tà promòver era hestejada d’aquest’annada que d’e previst un bal animat peth duò «ThouxAzun» (Guillaume Lopez e Clément Rousse), eth 20 d’abriu de 2019 ara sala deras hèstas d’Arcizans-Dessús/Galhagòs (65), dab en permèra partida : «Caï t’aci».
