La hèira a la collècta au COMDT
Lo COMDT de Tolosa, ancian Conservatòri occitan, qu’obrishó au mes de genèr un portau web documentari : un catalògue de ressorças en linha qui permet de consultar los hons d’archius e collectatges, e telecargar ua part de las sequéncias sonòras. Que parlam aquiu de 160 òras de documents. Ua iniciativa hastiosa e ben·hasenta, qui muisha a cèu ubèrt los testimònis fondators d’ua creacion occitana tostemps en camin.
Mantuas institucions publicas que desvolopan la difusion de documents referéncias en matèria de cultura e de lenga occitanas. Citem lo Cirdòc, o enqüèra lo site « Son d’Aquí ». Lavetz, perqué e s’ameritaré un article sancèr, aquera istuèra de collectatges ? Pr’amor qu’ei ua accion de bon notar : respècte au desvolopament de l’accessibilitat a las ressorças en lenga nosta ; e a l’arsec entà difusar un saber popular qui apartien a tots. Botem, ua persona ressorça d’experiéncia e d’immersion estacadas a un contèxte precís, e un-a enquestaire-a collectaire-a tocat-da per la valor-memòria d’aqueth temoenh. En tot devisar, questionar, contar o cantar, l’encontre enter collectat e collectaire qu’ei enregistrada. Que vad un document tà la posteritat. E après ? Qué hèm d’aquò ? Peu moment, los comedians, musicaires, cantaires, contaires que’n hèn espectacles. Tant de bon. Lhèu los artisans, agricultors, politics, e autes tribalhadors qu’i capihonaràn, entà neurir las practicas actuaus.
Qué que’n sii, las documentalistas deu COMDT qu’an trobat un biaish de valorizar aqueth hons, mercés a la tela, dab la Collectocreacion. En partir d’un còrpus de notíças, l’internauta-musicaire qu’ei envitat a tornar balhar la soa version d’un tròç o d’ua canta.
Lo document sonòr que n’ei lo punt de partença : « ne balancitz pas a samplar, associar, desviar, completar, reinterpretar (…).
La quantitat, la varietat e l’originalitat de las interpretacions que portaràn testimòni deu riquèr culturau e deu potenciau creatiu de las musicas de tradicion orau deu maine occitan ». La permèra collectocreacion, en genèr e heurèr passats, que recebó mei de vint participants : grops de cantaires amators, musicaires professionaus, estudiants… dab quauques còps tres o quate versions regde diferentas d’un medish tròç. La Collectocreacion qui vien, la tresau dejà, que’vs dèisha enti’au 21 de julhet tà enviar las vòstas contribucions en MP3 per mail ad aquera adreça : documentation@comdt.org. Lo còrpus de dètz enregistraments – en linha sus cataloguedoc.comdt.org – qu’ei « destinat a v’immergir en ambients primtanèrs e estivencs », dab ausèths de tot escantilh, prats e racontes de dalhaires, arrius e banhadas, quistas de mai, amor e maridatge, e paisatges sonòrs tà balhar « ua tonalitat mei impressionista ».
Tà clavar aqueth clic & scroll ? A permèra vista, l’enregistrament que calha ua paraula, un biaish, ua musica. A nosauts de segotir la prova, e d’ac tornar botar suu camin de la tradicion, qui neureish e parla au present.