Una de las librariás « occitanas » la mai completa es la del Centre Cultural Occitan de Roergue. I trobaretz de produches culturals de tota mena en rapòrt amb la lenga occitana, la cultura e l’istòria locala.
Sa difusion s’es considerablament desvolopada a flor e a mesura del desvolopament de la librariá-botiga e de l’impressionanta preséncia del taulièr del CCOR a de nombroses eveniments del departament e d’endacòm mai. Aquela omnipreséncia pòrta sas frutas e las vendas d’un volum fòrt interessant contunhan de créisser (4% en un an). Uèi, la librariá  se vòl encara desvolopar en fasent l’escomesa d’Internet e del pagament desmaterializat per contunhar a facilitar l’accès del public a una gama totjorn mai larga de produches culturals : libres, CD, DVD e autres.
A l’imatge de çò que se passa per una granda part de nòstra economia, e sustot en matèria de difusion de produches culturals, lo passatge a Internet e al pagament en linha representa un fòrt enjòc.
De fèit, encara uèi, nombre de vilas o de departaments mancan d’una vertadièra ofèrta en matèria de produches culturals occitans. En creant aquela vertadièra botiga en linha dedicada als libres, DVD e CD en occitan, lo CCOR bota a posita de totis, sens cap de restriccion geografica e amb los delais de liurason los mai corts, una de las principalas ofèrtas de produches culturals (gaireben 1500 referéncias en tot).