Conquistas en temps de pandemia

Vòstre magazine d’actualitat culturala, e son lectorat amb el, a fach un torn del quadrant calendari (e mai) jol dardalhraionament, fuòc, calor d’una actualitat sanitària gaire conortanta. Lo camin s’es contunhat, e segurament per qualques meses encara, d’un autre biais, amb de procediments que poiriam afiblarornar qualificar del deliciós neologisme de “distancials”. Aprèp un an d’escapadas a mostrar quicòm mai, avèm causit d’abordar la cruda realitat, una realitat pasmens irreala, sarrats que sèm davant d’ecrans que, per una bona part de nosautre·a·s, constituisson los orizonts quotidians de la vida professionala… e personala.

Se s’èra plan entamenada abans, la desmaterializacion de nòstra societat se perfila, e la marrana venguèt apondre una injoncion e una necessitat a una mòda e un anar ja existents. Se parla d’Homo Numericus, coma un estadi novèl de l’evolucion, sens qu’òm sàpia per de bon çò que s’amaga darrièr LO numeric, concèpte forra-borra. Tot i passa : trabalh, lésers, socializacions, ara la cultura tanben… amb un succès mesclat.

E a l’encòp descobrissèm de mondes, desvelam d’aisinas, per aquestes territòris creats mas pas complètament explorats. Pel quite occitan, de conquistas son estadas fachas, recentament : d’estudiant·a·s de Tolosa – Joan Jaurés nos en balharàn qualques exemples esclairats, que sián aquí mercejat·da·s. E mai Lo Diari se “numeriza” : legissètz benlèu la version desmaterializada de la revista, obtenguda aprèp soscripcion a nòstre sistèma d’abonament en linha, mes en plaça… en causa de la pandemia.

Seguissètz lo fial d’una navigacion entre doçor e amarum, estèls e corrents… cap sus Tèrra 2.0 !