Seleccionar una pagina

Dorsièr

0 |

ReVOc, la reconeishença vocau en occitan : perqué e com ?

De totas las evolucions numericas modèrnas, son benlèu las que son liadas aus telefòns personaus qu’an lo mei d’impacte dens la via de cada jorn. D’un simple utís de comunicacion, es vienut quasi un mini-ordenador que pòt estar liat emb la tela, on se pòt a l’encòp hèser la lista das crompas e jugar sus una aplicacion tot en deishar passar lo temps aus comuns. Dempuish quauques annadas ja, parlam aus telefòns e autes objèctes dits « connectats »… e nos responen ! Nos sembla normau de trapar quauqu’un que ditz « Ok Google… » a son telefonet, e que responi d’una votz robotica. Fonciona tanben quan s’agís de demandar una musica especiau a l’assistent intelligent dirèctament connectat aus hautavotz acostics dau salon, o quan se ditz a la veitura de lugir lo darrèr messatge recebut.

L’utís que permet d’analisar la votz e dau tractar en tèxte escrit es la reconeishença vocau, hèi partida das tecnologias que permeten aus umans d’escambiar a l’orau emb las maquinas. Per exemple, per que la comanda siga compresa dau telefòn, l’orau diu estar transformat en tèxte, e, après recèrca, la resulta es lugida per l’assistent intelligent.

Es lo Congrès permanent de la lenga occitana que lança l’elaboracion d’un tau utís dens la lenga nosta emb l’aplicacion ReVOc ; en collaboracion emb la Rolde de Estudios Aragoneses que desvelopa la medisha tecnologia en aragonés e la fondacion basca Elhuyar, en carga dau partida tecnica dau programa.

La creacion d’una tau aplicacion demora dens la dralha dau projècte Linguatec qu’a per amira de melhorar lo nivèu de numerizacion de l’aragonés, dau basco e de l’occitan. De hèit, dens una societat de mei en mei numerizada, es necessari per totas aqueras lengas d’auger un maximum de ressorsas e possibilitats dens lo numeric. De notar que lo 23 de heurèr de 2021 se tienut la presentacion de Votz, l’aplicacion de sintèsi vocau en occitan dau Congrès, que permet a una Intelligéncia Artificiau (IA) de transformar dau tèxte escrit en orau – utís notadament emplegat praus GPS, praus transpòrts en comun, per las aplicacions de lectura automatica… Una aplicacion qu’es tanben dens aquera dralha.

L’aplicacion ReVOc, era, que poirà transformar la votz en tèxte, es una tecnologia emplegada praus assistents personaus (la famosa Siri d’Apple per exemple, o la recèrca vocau de Google), es tanben utilizada prau sostitolatge automatic das videos. Poirà tanben servir a la transcripcion automatica de collectatges, mercés a un module qu’aidarà lo trabalh das lingüistas e enquestaires.

Per foncionar, la reconeishença vocau utiliza egaument una IA per transcriure la votz en tèxte, per aquò, i a besunh d’entrainar l’IA emb das audios ja transcrits, mes tanben de tèxtes grans : atau, poirà trapar que tau mot se tròba sovent a costat d’aqueu mot, d’un aute… Per que lo còrpus siga lo mei representatiu dau diversitat das locutors, lo Congrès desvelopèt un utís de contribucion on tot lo monde pòden enregistrar sas frasas que seràn ajustadas, es tanben per auger lo corpus lo mei ric possible que lo Congrès es en partenariat emb de nombrosas estructuras que perpausan das contenguts multimèdias en occitan, taus com La Talvera, Radio Entre 2 Mers o enqüèra lo site Diu NegreNDLR : E Lo Diari !. Aquera purmèra etapa de collècta durèt tot lo long de l’annada 2020. Augan, s’agís de finalizar una grana partida dau projècte (notadament d’acabar la collècta das dadas) e de hicar das aspèctes tecnics, per que 2022 siga l’annada dau desvelopament e da validacion finaus, on l’aplicacion serà testada.

Atau hicat dens lo numeric, ne’s poirà pas mei empechar de demandar au telefòn de votz viva emb un « Òc-ben Google… » a la debuta !

Version audio :

ReVOc

by Votz | Lo Congrès permanent de la lenga occitana

A prepaus de l'autor

Anna Cocurau

Anna es estudianta d'occitan a l'Universitat de Tolosa Joan Jaurés.

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !