Seleccionar una pagina

Dorsièr

0 |

Parpalhon blau

Quin periòde !

Òc, quin periòde sèm a viure !

Quand soscam al primièr embarrament, al mes de març de 2020, nos remembram gaireben totes un moment que nos disiam qu’aprèp, la marrana seriá acabada. Quina foguèt nòstra suspresa (o pas) d’aprene qu’un segond confinhament puntejava al mes de novembre. Aqueste foguèt plan diferent del primièr, e qualques caras comencèron de se mostrar sus internet per parlar un pauc de l’occitan !

Cobèrta Lo Diari 62

Demest aquestas, podèm trobar Parpalhon Blau, Gabrièu de son (pichon) nom vertadièr. Gabrièu, estudiant a l’Institut de Sciéncias Politicas de Tolosa de 22 ans, es originari de Niça. Paradoxalament, apregondiguèt son aprendissatge del Niçard a Tolosa, e perseguiguèt amb lo lengadocian un còp tornat a Niça. Es aital que comencèt de se trachar de la transmission de la lenga e que decidiguèt de crear de contengut sus YouTube. L’enveja de se lançar sus la plataforma, l’aviá ja dempuèi qualques tempses mas, per de rasons personalas, foguèt lo segond embarrament que li balhèt una mena de « rason » de començar.

Aquestas vidèos, destinadas a de mond que coneisson la lenga, que la vòlon aprene o que venon de la descobrir, foguèron dins un primièr temps de corses de lenga que i faguèt una presentacion generala de la lenga occitana. I explicava los biaisses de prononciar l’occitan (5 vidèos per parlar occitan e una per plan l’accentuar) perque li agradava de parlar de lingüistica. A l’ora d’ara, amb las envejas que càmbian, prepara de contenguts plan mai diferents dins los meses que venon.

Aquesta cadena faguèt fòrça bruch dins lo mitan occitanista a la debuta, tant i a que la primièra vidèo aguèt mai de 7 000 vistas ! Per balhar una idèa, vegèri la vidèo de mercés a las rets socialas: la publicacion apareissiá un fum de còps sus ma pagina d’actualitats ! Soi estada d’alhors fòrça suspresa (agradivament) de poder trobar un tal trabalh sus YouTube. Gabrièu manquèt pas de remarcar aquel lançament puèi que dins una entrevista que poguèri aver amb el, me fisèt qu’èra estat plan estonat del vam qu’aviá pres sa cadena tre la primièra vidèo : « Ai fach la vidèo, e l’endeman, de personas m’an mandat de SMS per me dire : « Ò, mas sabes que i a LinguisticaeAdd a Tooltip Text qu’a comentat ta vidèo e qu’a dich qu’èra parfait ». De mercés a l’acuèlh fòrça positiu que recebèt sa cadena, Gabrièu es fòrça fisançós per la seguida e vòl, ara qu’a acabat las vidèos lingüisticas, crear de sequéncias novèlas per s’aprochar mai del contengut que poiriam sonar « YouTubenc ». Vòl portar una cadena de divertiment completament en lenga occitana, sense demorar sonque sus la linguïstica.

Uèi, li podèm sonque desirar lo melhor ! Son aparicion, que foguèt inatenduda, nos daissa dins l’espèra de ne veire mai, e podèm èsser segurs qu’a encara un fum de suspresas de nos mostrar e de causas de nos far descobrir.

Per ara, totes a vòstres quasèrns, podètz ja anar aprene o tornar aprene la lenga occitana !

Version audio :

Parpalhon Blau

by Votz | Lo Congrès permanent de la lenga occitana

A prepaus de l'autor

Océane Zerdab

Océane es estudianta d'occitan a l'Universitat de Tolosa Joan Jaurés.

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !