Fotomaton : Mariona Miret
Recentament, Mariona Miret recebèt la mencion del prèmi Joventut de l’Euroregion Pirenèus Mediterranèa coma influenciaira (D’autres premiats èran lo podcast País Invisible, Parpalhon Blau, Las aventuras de Man e Mi…), una distincion que recompensa un trabalh bèl cap a la visibilitat de la lenga. Aquò o fa notadament pel biais de son compte Twitter, o d’autres mèdias socials. Activista, “revitalizatritz”, traductritz, que faguèt un mastèr en relacions internacionalas, catalana mas que trabalha tanben amb la Chambra d’Òc en Itàlia… per fòrça aquí nos parlarà pas que d’una part de çò que fa !
Lo prèmi qu’aguères coma influenciaira definís plan ton trabalh ?
Aquel prèmi es una bona definicion de mon trabalh, mas pensi que cal « desglamorizar » los prèmis e tanben lo succès. Ongan fa un an e mièg que soi entrepreneira e tròbi que d’autras personas qu’an tanben ganhat de prèmis o qu’an de succès amb la lenga de còps son idealizats e aquò nos bòta de pression ! Èsser suls malhums socials es quasi un trabalh perque pren fòrça temps, e ieu dins ma vida, cerqui d’èstre presenta, al quotidian, dins la realitat fisica. Çò que vertadièrament m’agrada es lo contacte ambe la comunautat, mas trabalhar de l’ostal soleta darrièr un ecran es fatigant, qu’es pas natural. I a los dos costats : m’agrada mas m’alassa. E es pas tanpauc tot çò que fau, es una partida pichòta !
Perqué as causit de trabalhar suls malhums socials ?
Pensi que la preséncia de las nòstras lengas e de l’occitan en particular suls malhums socials es plan importanta. Ieu comencèri de biais natural, perque la comunautat de lengas es esparpalhada, per arribar a tocar las personas fisicament, de còps es dificil. E tanben per ieu, lo sens de mon trabalh es internacional, va al delà de las frontièras, tant per lo catalan coma per l’occitan o las lengas nòstras d’Euròpa, que sián minorizadas o pas. Es quicòm qu’interèssa totas e totes, e dins los malhums socials i a pas de frontièras, podèm arribar pertot, es aquò que m’agrada.
Quin es l’objectiu del teu compte Twitter, en plen desvolopament ?
Comencèri sus Twitter fa qualques annadas, e pauc a pauc, me seguiguèron lo compte. Ai pres una direccion mai activista, que definissi mon trabalh coma un activisme, una militància per la lenga e la cultura. Quand publiquèron aquel concors d’influenciaires anèri veire çò qu’aviái fach pendent totas aquelas annadas e me mainèri que, sens me rendre compte, aviái vertadièrament tirat qualques dralhas per influenciar suls malhums. Fa mai o mens un an, causiguèri de venir entrepreneira per l’occitan, revitalizatritz lingüistica, coma m’agrada de dire. Mon objectiu es d’arribar a tocar lo mai grand nombre de personas possible e de far passar ma proximitat per la lenga.
Cossí fas per menar ton activitat ?
M’agrada fòrça de far passar siá d’idèas importantas, d’innovacions sus las lengas del monde, a l’occitan, siá de causas del monde occitan cap a l’internacional. Per exemple, conti çò que se passa a l’Escòla Occitana d’Estiu, qu’i vau cada an, en anglés, en catalan o dins d’autras lengas, coma soi poliglòta, aital lo monde pòdon compréner. Es una causa informala, partegi çò que fau a cada moment ambe ma comunautat de lengas sus Twitter. Es pas un apròchi critic, que n’i a fòrça sul malhum, mas vertadièrament s’agís d’apondre quicòm de positiu, d’amor per la lenga. Es çò que m’agrada.
