[kosmopoli:t]
Kosmopolit qu’ei un jòc qui permet d’aubrir un restaurant internacionau dab los amics. Un restaurant cosmopolita on s’audeishen mei d’ua lenga…
E òc, gerir un restaurant ! Que s’ageish donc d’un jòc de cooperacion, e que’t cau minimum 3 amics entà despartí’s los ròtles. D’en prumèr, un serviciau qu’a un telefonet dab l’aplicacion Kosmopolit e escotaders, puish un “cap de partida” (de non pas con·hóner dab un mèste de jòc, aquiu qu’ei mei un mèste d’ostaleria) dab un quasernet e un gredon, e enfin cosinèrs qu’an, eths, cartas “ingredients” e cartas “plats”, dab los noms e originas geograficas d’aqueths plats.
Lo serviciau que lança l’aplicacion e que’s dèisha gavidar, los prumèrs clients qu’arriban e que’us cau préner las comandas. Après, que las te cau tornar díser au cap de partida entà qui las nòte suu son quasernet e qu’ac mande tot a la cosina, qui s’encarga d’amassar lo nom deu plat, l’ingredient e la taula concernida.
Quan la cosina qu’a trobat lo bon plat e lo bon ingredient, que transmeten las cartas dens lo sens contrari, e lo serviciau que valida sus l’aplicacion.
Òc-ben, mes brembatz-vos qu’ei un restaurant internacionau ! Los vòstes clients que son donc d’ua diversitat lingüistica de las granas, qu’entenèm donc deus “Ou-a pataka“, “Gastam’béla” e tanben… “lou peskatssou” en occitan !
A la tota fin, entre lo servici e la cosina, las sonoritats que’s desfòrman e n’ei pas totjorn aisit de compréner çò qui vòu lo client, e aqueth pòt acabar per s’impacientar…
Entà diversificar las partidas que podem causir diferentas zònas geograficas e nivèus de dificultats.
Brac, Kosmopolit qu’èi un bon jòc de cooperacion e d’ambient, dens lo quau que ns’arridem plan a prononciar los plats en tot estressar de’ns i escàder lo servici. L’aplicacion qu’èi plan hèita, dab un vertadèr ambient sonòr de restaurant, qui’ns balha plan l’enveja.
Lo petit conselh de mei : jogatz dens pèças espartidas (ua tà har sala de servici e l’auta tà la cosina) entà mei de realisme e d’enjòc.
De saber !
Kosmopolit qu’ei mei qu’un jòc pr’amor deu son aspècte lingüistic qu’ei estat realizat per cercaires, especialistas e locutors originaus, entà ne saber mei un liberet hòrt interessant sus aqueth tribalh qu’èi hornit dab la boita.