Seleccionar una pagina

Au casco

0 |

Oui ma gâtée !

SCH, Jul, Alonzo… La prima de 2021 a vist espelir un fum de disques de rap marselhés. Un biais de dire, un biais de cantar, qu’encanta leis afogats dau genre desempuèi trenta ans tot just, e la sortida nacionala dau premièr album d’IAM. Un biais collectiu tanben, tant la nocion d’èstre marselhés sembla comptar per leis artistas de la vila, qu’esitan pas a si metre ensems per trabalhar.

A l’escasença de la parucion de son album JVLIVS II, SCH es estat entrevistat per Mouloud Achour dins son emission Clique. L’artista es tornat sus lo tròç Bande Organisée, que faguèt una deis entradas lei mai marcantas de l’an 2020 en rap ambe son famós « Oui ma gâtée ».

La frasa dona lo ton de l’album, egotrip segur, tanben pastat d’un francés cafit d’expressions marselhesas de tria. E coma a chasque còp, la premsa sembla descubrir un lexic novèu, non pas « joine », mai bessai exotic.

Quand lei ràdios e la premsa nacionalas si trufan de sa mòrga en shòrt e chancletas e de seis expressions, la musica dau rapaire dau barri de Sant Joan s’auve jusca dins lei salas de fitness de banlèga parisenca. L’album 13’Organisé, e aqueu single en particulièr, es estat un tsunami espantant. Fins qu’ais escòlas mairalas, si pòu entendre cantar « Zumba cafew », e meme leis aujòus conciutadans Massilia Sound System saludan lo travalh menat per Jul. Desempuèi lei succès recents de Jul ò Alonzo – sens parlar de Soprano, qu’es vengut un dei noms màgers de la pòp francesa – lo rap marselhés es tornat a la popularitat qu’aviá a la fin deis annadas 1990.

Vint ans avans 13’Organisé, l’album Chroniques de Mars, portat per Imhotep d’IAM en 1998, aviá ja un èr de reunion de familha, un cliché d’epòca dau panèl rap de la vila. La compilacion ven tot just de reparéisser sus lei plataformas de streaming, e recampa ja Akhenaton e Shurik’n d’IAM, Le Rat Luciano e Don Choa de la Fonky Family, encara actius a l’ora d’ara.

Ce que si remarca tanben, dins lo succès de Jul, es la fòrça dau collectiu. Lei ramificacions de l’aubre genealogic dau rap marselhés s’entremesclan dau lòng de 13’Organisé, que convida lei noms novèus de la scèna locala, per exemple Soso Maness ò Kofs, tant coma leis ancians Alonzo e Le Rat Luciano, sens parlar d’IAM.

D’alhors, Jul convida sus son album de gents coma Stone Black de Carré Rouge, ò Fahar de Puissance Nord, doei grops mitics maugrat sa manca de succès, apareissuts a la fin dau sègle passat. Un fenomène de banda que si retròba pas tant qu’aquò dins la rèsta dau rap francés d’ara.

Segur, i a agut d’albums marcants, 93 Empire, portat per Sofiane, metèt en avans gaireben tot lo departament de Seine-Saint-Denis (desempuèi leis ancians de NTM fins a Vald), Médine inicièt a son torn la seria de títols Grand Paris, mai si constata que leis artistas dau ròdol parisenc semblan pas tant units coma lei Marselhés.

Fau dire que tot aqueu monde es connectat : lei membres d’IAM ajudèron a l’espelison de la Fonky Family ò de Psy 4 de la Rime, qu’elei tanben ajudèron lei generacions seguentas a si far sa plaça dins leis aurelhas dau public.

Coma qué, la transmission, lo passatge de relais, valor dau defunt movement hip-hop, es totjorn au còr de la creacion marselhesa.

Patwa

De la Planète Mars

IAM, …
Labelle Noire / Virgin, 1991

Patwa

Chroniques de Mars

Collectiu
Kif-Kif Productions / BMG, 1998

Patwa

13’Organisé

Collectiu
Rien 100 Rien / Believe, 2020

Patwa

JVLIVS II

SCH
Maison Baron Rouge / Rec 118, 2021

Aqueste contengut vos es ofèrt per :

Bloc-marque OPLO

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Camille Martel

Camille Martel, ò Yellow, es naissut en 1986 en banlega parisenca. Vengut montpelhierenc en 1993, es ara jornalista e musician, versat subretot dins la cultura hip-hop, que liga a la lenga occitana. Membre dei grops Doctors de Trobar, Humpty Dumpty, Le Café du Pauvre, Les Peigneurs de Girafe, Mauresca... es tanben un segueire de lònga de Massilia Sound System, una expertesa e de liames que li fagueron escriure un libre, "La Façon de Marseille" (edicions Le Mot et Le Reste). Ambe Jordan Saïsset, signa "Musiques Occitanes", sempre en cò dau mesme editor.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.