Seleccionar una pagina

Critica literària

0 |

Jean-Luc Séverac e Gérard Zuchetto – ” Entrebescs e cançons “

Entrebescs e cançons
Jean-Luc Séverac
e Gérard Zuchetto
Edicions TròbaVox, 2018
20.00€

Associar la paraula a l’imatge, o l’invèrs… Es benlèu ben lo còr de la reflexion que menam dins aqueu Diari. Faire dialogar lei linhas, lei colors, lei traças, lei fòrmas, lei tenchas e lei gravaduras, lei telas e leis esculturas ambé lei mòts : es çò que dona una dimension, una espessor, un còrs a la lenga que, per definicion, es invesibla e fugidissa. D’un autre latz, la lenga, ela, pòt contunhar lo dessenh, l’aprigondir e dobrir de fenèstras, lo perseguir sensa fin coma una pintura qu’escapariá a son quadre de lenha. Leis òbras d’art (pinturas, estampas, fotografias…) acompanhan sovent lo tèxte e d’uneis autors passan d’una expression artistica a l’autra e sabon illustrar sei quiteis òbras. Pensi sovent a la linha espurada dau visatge dessenhat de la man de Max Roqueta sus la cobèrta dau recuelh D’aicí mil ans de lutz, per exemple.

Mai aqueu rescòntre entre la paraula e l’imatge es mai que mai un rescòntre uman, un escambi entre doas personas, un vai e vèn dins un trabalh a quatre mans. La colleccion Votz de Trobar deis edicions TròbaVox vèn d’alhors de sortir un polit libre qu’illustra perfectament aquela idèa : Entrebescs e cançons de Jean-Luc Séverac e Gérard Zuchetto. Lo primier es un artista inclassable installat a Menèrbas, autor de la famosa Colomba de Lutz dau monument Als Catars que se dreiça dins la ciutat medievala, lo segond es un musician, cantaire, cercaire, editor que consacra sa vida a l’estudi e a la coneissença dau Trobar dempuèi d’annadas (dins una amira istorica, literària, scientifica e tanben actuala). Lei dos òmes son amics dempuèi 1972 e leis annadas militantas dau regrèu de la cultura occitana ; seguiguèron puèi cadun son camin, pendent quaranta ans. Se retròban uèi, totei dos, dins un libre que mescla poèmas e gravaduras, a travèrs un « entrevescar » estonant e colorat. Lei poèmas de Gérard Zuchetto, que coneissiam fins ara unicament coma especialista e interprète dei trobadors, son clars e plens de melodia, es una mena de « trobar lèu » d’ara, atentiu au monde que l’environa, ai pichòts instants que fan la vida de cada jorn. Lei mòts i dançan e la lenga jòga, calorosa, s’amusa a « torbar lo trobar » ambé gaug. Lei gravaduras son ricas, lei linhas dei visatges e dei còrs s’i entremesclan per crear una unitat massiva e expressiva, capitan d’embrassar lo reau, dins lo detalh e la vista d’ensem. Lei fremas e leis òmes dessenhats puèi gravats per Séverac (utiliza una tecnica originala de dessenh calcat e gravat sus de polistirène extrudat per l’estampatge) apartènon au païsatge que leis enròda, s’i fondon, coma se la carrièra, la còla o lei teulissas d’un vilatge foguèsson la continuitat de sa siloeta. Dau meme biais, lei dessenhs rejonhon lo tèxte, li respòndon o semblan de l’inspirar, van e vènon en ressaca de pagina en pagina. Avèm l’impression doça de « nadar contra sobèrna » per repréner una paraula trobadorenca, dins una aiga de mòts e de colors estampadas que sabon, ensem, dire l’amistat que nos permet de tenir drech dins aqueu monde.

A prepaus de l'autor

Silvan Chabaud

Silvan es redactor al Diari, òc, mas carga mai de casquetas qu'aquela : jol nom de "Chab" canta dins Mauresca (Fracàs Dub) dempuèi la creacion del grop en 1999, e tanben dins Doctors de Trobar, doas formacions que fan sentir qu'es lo Massilia Sound System que lo faguèt cabussar dins l'emplec vivent de la lenga occitana. La lenga la maneja d'alhors tant que publiquèt un recuèlh de poesia, "Leis illas infinidas / Les îles infinies" (Jorn, 2012). Enfin, Silvan es universitari, autor d'una tèsi sus Bellaud de la Bellaudière, poèta provençal del sègle XVI e actualament cargat de corses a la facultat Pau Valèri de Montpelhier.

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !