Un deliciós quasernet de cosina populara entre Corbièras e Fenolhedés

Sus una idèa del Parc Natural Regional de las Corbièras e del Fenolhedés, Felip Marcy, « encargat de la memòria viva », comencèt en 2019 una operacion que voliá recampar las recèptas emblematicas del tot nòu PNR. Un primièr produit es lèst, après doas annadas de cosina intensiva. Aqueste Quasernet de collècta de la memòria culinària es un florilègi de 15 recèptas per apasturar a totis : las mongetas coma a Caudièrs, l’alicòt d’auca de Pauleta de Puèglaurenç, o la veritabla faiçon de pastar le milhàs (milhor a la padena e cubrit de mèl). En mai, se son ataulats amb les occitans quatre vilatges catalans de Rosselhon. E a pas fait desprofitar l’afar ja qu’an permés l’importacion en çò dels gavaches de las bunyetes (en òc : las aurelhetas) o de l’ollada d’Estagell. Las bolas de picolat, elas, son ja dempuèi sègles – benlèu millenaris – d’especialitats lengadocianas.

Amb le Felip, les enquistaires benevòls an percorregut le territòri per i enregistrar mai de 360 variacions gromandas, de còps en occitan o en catalan. Mas al moment de trobar ELLe pronom es utilizat dins l’occitan local e le catalan. plat emblematic, l’afar manquèt virar a la sopa de mors : les participants desconfits se mangèron las sangs quand s’avisèron que la màger part dels plats tradicionals… an pas pus de nom ! Urosament les enquistaires avián las formulas secrètas dels cosiniers, e nos auràn pas daissat dinnar amb un bocin de pan. Mas èra malaisit de se botar d’acòrdi sens saupre le nom del plat… Mas chic a chic, en fasent la lista dels ingredients : fregir dins l’òli, l’alh, la ceba, le jolverd, e la menugueta (aquel darrièr es le miu ingredient secrèt), cubrir d’aiga calenta e après far bulhir les uòus, las patanas, las olivas, tot aquò amb de milh, e… Sambarlicotèc Es pas un ingredient mas la version locala de la formula abracadabra ! ! Nos sèm rendut compte, fin finala, qu’aviam totis un plat en comun, e que s’apelariá la cliqueta. I a encara de discutidas sus l’origina del nom mas ne teni ieu una petita idèa : a la fin de la primièra etapa, quand le freginat es lèst e qu’ajustas un chic d’aiga, la cocòta se bota a cliquetar, e òc ! Mas sèm pas totis d’acòrdi e tanbens avèm las nòstras petitas variantas, e le Carnet ne podiá gardar pas qu’una. E es la formula magica de Patricia de Rasiguèras que foguèt causida, que i ajusta, ela, de carnsalada. E non, vos levaretz pas de taula amb la talent.

Per recuperar aqueste tresaur de la cosina populara vos en ficaretz pas l’alhada vist qu’es disponible a gratis en telecargament sul site del PNR. Esperam ara les moments de degustacion e de convivialitat que la presentacion d’aquel quasernet menarà a organizar. Se n’avètz pas un afart, un ressopet es previst amb la difusion dels enregistraments àudio e l’edicion d’un quasernet mai ambiciós, amb un editor professional aqueste còp. Bon profit e bon apetís !