Seleccionar una pagina

Clic & Scroll

0 |

CEPD’ÒC – Centre d’Estudis de la Paraula d’Òc

La paraula e l’imatge

Jónher la paraula a l’acte es bensai jónher la paraula a l’imatge, en tot cas podriá èstre lo credò dau Cepd’òc, una associacion creada a l’iniciativa dei tres movements principaus de  defensa e de promocion de la lenga d’òc en Provença : lo Felibritge, l’Institut d’estudis occitans e Parlaren. Dins un monde d’uèi onte tot passa mai que mai per lo visuau, la vidèo, l’accion d’aquel organisme es essenciala e benvenguda, son chantier : immense. Prenètz adonc temps d’anar vos passejar sus la pagina web : www.cepd-oc.fr, i trobaretz de tresaurs e seguiretz l’actualitat de l’audiovisuau occitan en Provença.

Lo Cepd’òc se dona quatre tòcas màgers : la formacion deis actors de la lenga d’òc dins lei varietats de Provença (provençau, niçard e vivaroaupenc) ais aisinas audiovisualas, lo collectatge de la paraula d’òc dins la diversitat d’aquelei varietats, la publicacion de documents audiovisuaus (dvd-cd) a destinacion deis ensenhaires, la mesa a disposicion dei documents via lo siti internet e l’organizacion de projeccions, de conferéncias e d’exposicions. Lo Cepd’òc fuguèt per exemple present au festenau de la BD d’Ais de Provença, en 2017, i presentèt una taula redonda a l’entorn de la question de la revirada dei bendas dessenhas en occitan. Es tanben l’an passat qu’organizèt lo ClipClap d’ÒC, rescontres a l’entorn dau cinemà provençau onte fuguèron presentats d’extrachs de Malatèrra de Felip Carrèse, una difusion de dos episòdes de La Seria d’Amic Bedel, entre autre. Son de moments rares de reflexion sus una dimension sovent delaissada e mauconeguda de la cultura d’òc e pasmens cruciala per son avenir. L’audio-visuau permete de jogar sus dos nivèus : a l’encòp la sauvagarda e la transmission, e la creacion totala, l’invencion, l’innovacion…

Una granda causida de vidèos es propausada en linha sus lo site dau Cepd’òc, i trobaretz justament de collectatges, de testimoniatges requists de locutors naturaus de lenga d’òc tant coma d’entrevistas o de pichòts reportatges sus l’actualitat de la cultura occitana en Provença. Per perseguir lo viatge, podètz retrobar l’immensitat de la colleccion audiovisuala de l’associacion a la mediatèca sestiana dau COL’ÒC que fuguèt encargada de la conservacion d’aquèu patrimòni. Lo Cepd’òc es sostengut per l’Estat, la Region Provença, lo Despartament dei Bocas dau Ròse e la comuna d’Ais, mas es subretot en liame permanent ambé d’associacions e d’actors au nivèu locau que bastisson tot un malhum, una ret umana aqueste còp que ten tota la riquesa de la cultura d’òc en Provença. Clicatz : click, click and scroll ! Mai per anar en delai deis escrans e viatjar dins lo fabulós continent escondut de la cultura occitana, au còr de Provença, en son, en lutz e en imatges.

Copyright: Freepik.com

A prepaus de l'autor

M’aboni !

Anóncia

Lo CalenDiari

Obrir lo CalenDiari

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !