Seleccionar una pagina

D'escart e de talvèra

0 |

Bernat Sarrieu, un mauconeishut de mes !

Que’m caleriá plan mes qu’aquesta pagina enà parlar coma cau deth Bernat Sarrieu, dont Miquèu de Camelat escrivèc ena sièva  Literature Gascoune  açò : « Hilh de reyent, agregat de l’Universitat e proufessou de filosofie, Sarrieu aus soûs lesés qu’a toustems tribalhat permou de la Patria. Qu’ou debem hère de bèrs (Era Garlande, 1903) mes n’ère goayre pouète, ya que rimèsse d’abiade, ne tapoc autou dramatic… Per aco, òmi subervalent e d’amistous ligamis, e, tant qui biscou, û dous miélhes oubrès de la nouste Rebiscoulade. La soue obre escriute, e mey encoère l’inedite, qu’ey de gran endoum .»

Eth jutjament deth mèstre bigordan qu’ei dur, coma tanplan eth de Lafont e Anatole ena « Nouvelle histoire de la littérature occitane qu’arrepròchan ath fondator dera « Escolo deras Pirineos », qu’editava  Era bouts dera mountagno , d’aver tròp de gost pera dialectologia e de tròp protetjar « un Felibrige très folklorisé en une région riche en traditions locales, en costumes, en rites et une littérature aussi abondante que médiocre de patoisants » ! Atau ! Eths mots que son dits de cap a un Sarrieu qu’ aviá escrivut en n°10 dera « Bouts » en 1910, paja 243 ; « tout le Midi de la France, au sud de la Creuse et de l’Isère, parle une seule et même langue, la langue d’Oc » ! Anatole e Lafont coma tròp d’occitanistes que se’n vesen enà reconéisher qu’òm pòt créser a ua lenga d’Òc en tot èster sensible ara qualitat deths parlars. Sarrieu, eth, qu’anava tanplan a pensar un « esperanto littéraire » en tot deféner mes que tot eth sièu « gascon luchonais ». Eth amic Bernat Arrous qu’a plan explicat aquò en un magnific « Centenaire de l’Escolo deras Pirineos » dam ua referencia ath Grèc ancian qu’aviá ua « kòinè » ath costat deths dialèctes.

Espaci de ressorças TG'OC - don de Maurice Samson

Espaci de ressorças TG’OC – don de Maurice Samson

Tiò ! Bernat Sarrieu que fuc gran Umaniste autant qu’òme estacat ath parlar sièu, dont escrivèc tant de pròsas e poesias, e pas solament ena Bouts. Que mos cau reconéisher eth meriti deth Andriu Lagarde d’aver saludat eth poète ena sièva inestimabla « Petite anthologie occitane du Comminges » (CRDP, Toulouse, 1976) on cita un tròç de « Pirèna », mes que devem ath Aranés Jèp de Montoya de poder léiger en son « Vademecum aranense » tres trocets dera epopèia en 12 cants e 32.123 vèrses : ERA PIRINEIDO. Qu’avetz plan leijut : 12 cants, 32.123 vèrses, ua òbra que poderiá fèr somiar d’Omèra, uei encara inacessibla ath legidor ordinari !

Que mos acontentaram uei de dar omatge aths qu’an cresut en Bernat Sarrièu tanben coma escrivan e pas sonque militant e sapient universitari. Plaça doncas aths Yvonne e Jules Ponsolle, felibres maudits en son temps peths occitanistes, que mos condan ce quin recebèren de nebots de Sarrieu ua envolòpa on i aviá « 268 petits papiers volants, écrits d’un premier jet », e’n balhèren un choès en ua brocadura der’Escolo. Taus papèrs que’m fèn pensar aths que Blaise Pascal s’amagava dejos era camisa !

Que vos condi aqueras causas sonque enà dar-vos era enveja d’anà’i véser de mes proishi. Benlèu ara Sent-Joan d’Aran, en solstici d’estiu, que Sarrièu celebrava : « E’tch houec crepitant que gahèc Et tros, è dera sôla at front que l’engloupèc. »…

A prepaus de l'autor

Miquèu Pujòl

Un « Gavatch » en « Diari ». Nascut eth 27/01/1932 a Ercé en Haut-Coserans, qu'è parlat «gascon ara popa, qu'ei era mièva prumèra lenga, mes passat peras escòlas guèita qu'ensenhè eth francés (e un chic latin e grèc), e eth « occitan » que'm demandèren d'ensenhar enas annadas70. Militant dera Causa que venguè doncas , e encara mes enas annadas 90, quan m'arretirè en Bigòrra. Actor de Radiò-Païs, autor de Cronicas en Jornau locau, de plan de tèxtes de tota mèna en revistas (Païs Gascons Per Noste, Reclams, Gai Saber, autes...) e per mantun Concors d'expression gascona, actor deths « Amis d'Aulus et de la vallée du Garbet », embauchat en dus filmes, « l'Orsalhèr » e « la Vallée des Montreurs d'Ours » en qualitat de petit-filh d'un Orsalhèr. Que i a monde que m'an coneishut militant communiste pueish gauchiste deras annadas 50 a 80, e sindicaliste deths peluts en licèu de Murèt. Que som riche de cinq mainats, autant de petits-mainats, e de dus arrèr-petits-filhs. Que contunhi de participar aths « Amis d'Aulus, e a Radio-Païs on è fèt pielas d'emissions desempueish 1993, uei « Navèras camadas » on parlam de tot en gascon. Qu'è responut ara invitacion deth « DIARI », on è volut èster « d'Escart e de Talvèra » coma som tostems estat, militant mes en ensajant de no pas pèrder era capacitat de reflexion, enraïgat e dubèrt, en particulièr en presentant escrivans un chic desbrembats o costats mau coneishuts d'aquestis. « Gavatch » que 'm volè aperar quan escrivè, cada setmana annadas e annadas, ena « Nouvelle République de Tarbes », Gavatch qu'ei un qu'ei d'aci e non ei tot a fèt , Coseranés en Bigòrra, gascon cap e tot mes qu'aima a parlar de Mistral, de Bodon, o Delpastre coma de Camelat, qu'aima eth francés e d'autas lengas, d'escart e de talvèra se voletz. Maishant cantaire, qu'è escotat tots eths cantaires, eths dera Hestejada de Bigòrra, e de plan de coralas, e en eths melhors Marti eth prumèr, Nadau, et tots eths qu'an seguit, d'Eric Fraj a Marilis Orionaa. Mes que m'agrada d'entener "le Chant des cerises", Montand, Brel, Brassens, e tutti quanti, e uei de mes en mes eths grans dera "musica classica", Mozart, Bach, Verdi, tot Intermezzo ara TV... qu'avetz endeviat ! Pr'aquò, quin plaser d'entener un arrèr-petit-filh attacar dab un auboès deth Coserans o un filh dar-se'n dab Nadau ! Miquèu Pujòl

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !