L’Odissèia d’Hakim
L'Odissèia d'Hakim
Legir un roman grafic es un moment unic. Los imatges e l’istòria se mesclan e nos menan dins un autre mond. Pasmens, cossí causir l’òbra de legir ? Dins quina istòria s’abandonar per d’oras e d’oras ? Vos vau prepausar aquí de descobrir L’Odyssée d’Hakim, un roman grafic en tres tòmes, de l’autor Fabien Toulmé.
Fabien Toulmé es autor e dessenhaire, es a dire qu’es el que farguèt de A a Z la sieuna òbra. Per escriure L’Odyssée d’Hakim, partiguèt d’un constat que faguèt a prepaus de l’actualitat. En 2015, un avion s’escrachèt, lo pilòt se suicidèt, emportant amb el 150 personas. Fabien Toulmé se sentiguèt prigondament pertocat per aquesta nòva, auriá poscut èsser el, sa femna, sos enfants… La television passava en bocla aquesta informacion. Qualques tempses mai tard, un batèl naufraguèt, son pas mens de 400 refugiats que desapareissián dins la mar. Aquò passèt per malha, degun ne parlèt, l’informacion èra escassa a la television e dins lo jornal. Emai Fabien Toulmé se sentiguèt mens pertocat per aquesta nòva. Pasmens se pausèt una question : perqué sa sensacion de compassion èra mens fòrta ?
Es sus aqueste constat que l’autor cerquèt una persona per li contar son istòria e s’interessar a l’òme darrièr aqueste mot generic qu’emplegam sustot al plural : los refugiats.
L’Odyssée d’Hakim presenta donca l’entrevista facha per Fabien Toulmé amb Hakim, que ven de Siria. Hakim viu a Damasc, es urós, es un òme simple, pasmens serà tractat en terrorista quora ajudarà un manifestant tombat pel sòl. Puèi, seguirà una succession d’eveniments òrres que lo menarà fins a França aprèp aver traversat 9 païses. Es aquí que los dessenhs simples e redonds de l’autor ajudan de trapar de poesia e tanben d’umor dins la vida del personatge principal.
Lo roman conta la vida d’Hakim sus tres ans. Seguissèm las sieunas decebudas coma los sieus gaugs. Pasmens, de còps que i a, lo raconte tòrna dins lo present : i vesèm l’entrevista o la vida de Fabien Toulmé en cò sieu. Tornar a l’entrevista nos permet d’esclarir de punts que serián malaisits de compréner, Fabien Toulmé pausa las questions que voldriam totes pausar. Es aquesta entrevista que permet de compréner aisidament tota l’istòria, demoram totjorn a nautor d’òme. Tanben, lo fach d’aver un ligam entre la vida d’Hakim e la de l’autor permet de melhor s’identificar al personatge principal. Comprenèm lèu que la situacion d’Hakim poiriá èsser la de qual que siá, e mai la nòstra.
Fin finala, se devèm de legir aqueste roman grafic, primièr perque es agradiu, apassionant e tocant. Puèi, perque permet de compréner qu’Hakim es un tipe banal que demandava pas res a degun. Qual que siá pòt venir refugiat, quora un país s’abausona, siá t’abausonas amb el, siá fugisses. Alara vendràs, tu tanben, un « refugiat ». E parlarem de tu coma una massa, un grop, una menaça, e pas jamai coma un individú amb las sieunas crentas e jòias. Es aquí que l’òbra de Fabien Toulmé permet tanben de tornar balhar una plaça d’òme, d’uman, al mot generic de refugiat sovent emplegat per parlar sonque de politica.