Seleccionar una pagina

Umor

0 |

Abecedari dels jòcs

De la A a l’isèda, se passàvem per un jòc d’explicas suls jòcs de tota mena :

Amor

Als jòcs de l’amor, pensatz que l’azard ten un ròtle ?

Azard

Per azard, vos sètz ja demandats quala es la part de l’azard dins los jòcs d’azard ?

Bilhard

Val mai jogar al bilhard que de passar sul bilhard.

Bilhas

Soi tant malaisit qu’es per sacats que perdèri bilhas dins la cort de recreacion de l’escòla de Ciutat.

Cartas

A flor o a picas, l’ase mena la dança se te fendascla pas lo còr.

Cartas (II)

Val mai las aver en man qu’al fons de las pòchas.

Coide

L’ibronha sap jogar del coide.

Darrèr

Diga, Bodon, lo darrèr jòc serà totjorn temps de lo jogar… o pas !

Eleccions

Existís lo jòc electoral. Pensatz qu’es per jòc que tantes estatjants e estatjantas d’Occitània ajan portats plan de voses a çò qu’es de mai en contra del respècte de la diversitat culturala e d’una societat de paratge ?

Escapada

Jogar es ensajar d’escapar a las duras realitats de la vida vidanta. Los Angleses l’an plan comprés amb l’Escape game !

Flors

Coma Clamença Isaura, doblidetz pas de plan asagar vòstres vèrses per prene part als Jòcs florals.

Ganhar

Es mai aisit de ganhar amb un jòc de buòu''Jo de biòu : gros jeu, beau jeu'' (F. Mistral, Tresor dóu Felibrige) qu’amb un jòc de vedèl.

Gratussar

Abans, te gratussavas quand las piuses te rosegavan. Ara, gratussas amb una peçòta un cartonet per saupre qu’as perduda la moneda que venes de jogar.

Jogaire

Tot çò que finís per -aire manca pas d’aire.

Musica

La musica se jòga pas, se viu.

Olimpics

Los Jòcs olimpics son pas nòstre afar. Un còp de mai, refusèron d’i marcar la petanca.

Patacs

A la fièra dels trucs, se jòga dels pès e dels punhs.

Pila o crotz

A cada moment, per cada decision, pòdes jogar a pila o crotz : contunhar lo trabalh o anar beure l’aperitiu, aquò’s la question !

Pimar

D’aquel temps, se parlava pas occitan a l’escòla. Alara, per pimar, disiam « Chou… fleur… ». De qué dison los pichons de Calandreta ? Pensi pas que siague « Caulet… flòri… » ? « Caul… flor… » benlèu…

Professionals

Pels esportius, quand lo jòc ven mestièr, i pèrdes probable lo plaser del jòc.

Quilhas

Al jòc de las quilhas, cal desquilhar.

Quina

Las quinas, moment convivial dins los vilatges, an desaparegut : se pòt pas mai ganhar unes canards grrrrrasses, mas un bon de remesa de 10 € cò de la perruquièra del canton !

Rugbí

Los quinzistas temptèron de desvalorizar lo XIII en li disent jòc, mas lo XIII es tanben rugbí e tot espòrt deu èsser jòc.

Solelh

« 1, 2, 3, solelh ! » Quand siás a la paret e que te reviras, pòdes comptar sus tos uèlhs d’agla, mas mai sovent sus ton arbitrari, per remandar tal o tala dins l’ombra.

close

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Alan Roch

Alan Roch foguèt institutor pendent plan de temps, avant de venir animator cultural, çò qu'explica perque consacrèt una part de son activitat a escriure pels dròlles. E a contar, qu'Alan Roch es conegut per sas istòrias inspiradas de la tradicion e de la vida del seu país (Carcassona), que salpica d'un umor ironic. Son agach agusat li val d'escriure de cronicas dins mai d'una revista o jornal, e notadament sul rugbi, que n'es un afogat de primièra borra.

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Lo CalenDiari

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

Los darrièrs clips

Cargament...