Seleccionar una pagina

3QA

0 |

3QA… Alexandre Barthès

3 Questions A…

Alexandre Barthès

Alexandre Barthès es responsable de l’informacion-ressorsa al còr de la federacion Octopus, qu’amassa los actors del sector de las musicas actualas dins la region Occitània. Una vertadièra aisina de cooperacion e de desvolopament pels musicians e actors de la filiala. Alexandre Barthès, archivista e passionat de musica, nos dona aquí un agach avisat sus l’estat de las musicas amplificadas en occitan.

Nos podètz donar una definicion de « musicas actualas » ?

Ah, LA question… aqueste tèrme permet de definir un sector cultural, pas un genre musical particular ! Aquesta expression es estada retenguda en 1998 pel ministèri de la Cultura e la siá ministra de l’epòca, Catherine Trautmann. L’apellacion « musicas actualas » permet aital de regropar un brave camp musical anant del ròck al rap en passant per la cançon o las musicas electronicas mas tanben lo jazz, las musicas tradicionalas o las musicas ditas « del monde ». Per simplificar e per oposicion, tot çò que relèva pas de las musicas classicas es designat coma « musicas actualas » (o musicas popularas, musicas amplificadas…). Dins la màger part dels cases, aquela expression es utilizada pas que dins l’encastre de la mesa en plaça de politicas e non pas pels actors del sector entre eles (encara mens pels musicians e lo public). Per çò que me concernís, quand parli de musicas, de tal o tal grop amb de collègas, d’amics, parli pas jamai de musicas actualas.

Quin agach pausatz sus la dinamica de las musicas actualas en occitan ?

Soi pas un grand expèrt mas vesi una fòrt polida dinamica amb de musicians qu’an de trajectòrias als percorses fòrça variats (ròck, pòp, hip-hop, electro, punk, trad, metal…). Vau citar de joves e mens joves coma Rodín, Cocanha, CxK, Enlòc, Sourdure, Aqueles, Choc Gazl, Artús, la Mal Coiffée, Feràmia, P.A.T.O.I.S… e plen plen d’autres. Soi tombat sus una playlist de tròces sortits a partir de 2020, realizada per Louis Pezet (cantaire de Feràmia) qu’illustra plan aquela qualitat e aquela diversitat. Trobam de tot : de musicas per escotar, per cantar, per dançar mai pogotar ! Solide, lo punt comun es vertadièrament la lenga, mas me sembla que s’embarrassan pas de còdis e de dògmas impausats, siá per la lor familha musicala, siá pel fait de « cantar en occitan e de dever dire de causas sus aquel subjècte ». Tròbi aquò genial, pas cap de determinisme dins la creacion, es rica e variada, sèm luènh d’una produccion uniformizada.

Çaquelà tot aquel vam creatiu demòra discrèt sus la scèna exagonala ?

La minuta romegaire : tròbi aqueles grops e las personas que trabalhan amb eles (Sirventés, Compagnie du Griffe, Dardalh, Hart Brut, AFX Agency, Neblum, Ox’Ivent, l’Antre du Drac…) d’una paciéncia fòla, perque malgrat la qualitat de las produccions, de las vidèos ultrà plan produsidas qu’acompanhan los títols… sovent aqueles grops son invisibilizats professionalament ! De mon vejaire, aquò’s ligat a una manca de curiositat de d’unes professionals (difuseires, productors, organizators…), que fan pas l’esfòrç d’escotar, tre que se canta en occitan, coma se i aviá d’estandard tipe ligat a una lenga. Classan dirèctament en musicas « folcloricas », en « musica amistosa qu’espolsa la lenga ». Alara que, nosautres professionals, deuriam èstre los passaires d’aquelas musicas per que lo public i accedisca aisidament.

De veire tanben la conferéncia organizada en octobre 2018 al Metronum de Tolosa, « Les nouveaux explorateurs musicaux : comment en sont-ils arrivés là ? »

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.