3 questions a Alain Beurrier de Castanha e Vinovèl
Alain Beurrier
Es a se demandar cossí vuèi le teatre, que de mès en occitan, pòsca arribar a se fèr una plaça, tant menudeta siaga, demest les lésers e passatempses pletorics e envaïdors que coneguèm. Vaquí coma exemple l'aventura de la còla de teatre de l'IEO d'Arièja.
– 1 –
Alain Beurrier, a la basa, venètz del ròck puslèu que del trad, non ?
Òc, se pòt dire que sèm de rockers. Ieu fasiái de bassa electrica, Jean-Brice de batariá a Londres. Montèrem un grop a Besièrs que se disiá Traction ailleurs, jogàvem dins los festenals rock’n roll de França tota e crosàvem, de còps, los bretons o los musicians trad occitans, mas èrem plan luènh d’aquel mond que trobàvem, a l’epòca, « ringards » coma se ditz en francés… Mai tard, comencèt l’aventura musicala de L’Art à Tatouille e es per aquel projècte que comencèri de descobrir los ritmes e las melodias diches « tradicionals ». Cercavi, a aquel moment, de musicas per acompanhar un espectacle de carrièra e m’interessèri a Canteloube. Foguèri espantat per l’envam del public e l’eficacitat d’aquelas musicas.
– 2 –
E es d’aquela eficacitat naturala del balèti que nasquèt Castanha e Vinovèl ?
Dins L’Art à Tatouille fasèm puslèu de creacion en s’inspirant un pauc de las musicas tradicionalas, al cap d’un moment s’impausèt naturalament l’idèa de reprene lo repertòri trad occitan. Amb Jean-Brice nos botèrem a trabalhar totes dos, sens tròp chifrar. El a la vièla a ròda e ieu a l’acordeon. Lo duò foncionèt plan e tre los primièrs concèrts l’energia dels dançaires nos portèt la jòia e l’estrambòrd per contunhar! Tot se faguèt naturalament. Comprenguèrem, rapidament, que i aviá quicòm de poderós dins aquelas musicas. Castanha e Vinovèl quitèt plus puèi de virar e de desvolopar son estil, son biais, al servici de la dança.
– 3 –
3. 10 ans ja e un tresen disc, un pauc diferent d’alhors ?
Òc, un disc novèl qu’explòra de sonoritats novèlas, verai. Aquò ven d’un rescontre que faguèrem amb un grop aragonés de Saragossa : Pasatrés. Los convidèrem sus aquel projècte, portèron sas colors « ibericas » e d’instruments coma la gralha o de percussions que se maridan plan amb nòstra musica. Es tanben un album amb de composicions e pas sonque de represas, avèm escrich de cançons amb l’ajuda d’Ives Seguier per l’occitan, per exemple. Sus scèna es la meteissa formula : l’energia comunicativa del duò. I aurà pasmens de concèrts amb Pasatrés, d’escambis, e jogam tanben en Aragon ont las musicas tradicionalas son fòrt vivas. Sèm en plena virada e contents de veire que totas las generacions se retròban per dançar dins los balètis, en Occitània e a l’estrangièr.
Retrobatz Castanha e Vinovèl :
– lo 18 de mai a 19 h 00, a la FESTEJADES DE GRUISSAN,
– lo 27 de mai per la FÊTE DU POIS CHICHE, a 20 h 30 min
