Per plan las dançar – Danses d’Occitanie
Quin espòrt nos dona, tot a l’encòp, la possibilitat de « pensar, descobrir, aprene, e virat cap a l’exterior » ? Quina practica esportiva pòt aver « un impacte societal, far resson amb lo territòri, e carrejar d’estonantas istòrias umanas » al meteis temps ? Cercam doncas un espòrt de tradicion, de contacte, de ligam, de plaser, de paratge… Òc-ben, sabi : la dança ! Qué de melhor que se daissar emportar per la musica, dins lo ritme endiablat d’un balèti ?
Alara, es d’un DVD mai que mai necessari en aquestes temps estivencs que vos vau parlar. Un pichòt tresaur de totjorn aver a posita per venir – o demorar – la reina o lo rei del balèti de l’estiu. Parli naturalament de Per plan las dançar, publicat en çò de CORDAE/La Talvera.
Que siatz coneisseire·a en danças d’Occitània o que volgatz aprene los passes de basa, seguissètz Céline Ricard, Thierry Cintas e los musicians del grop La Talvera dins lors explicacions de la farandòla, dels virolets, del bràndol, de la ronda o encara de la borrèia. Cada dança es esclarcida, en francés e/o en occitan, e filmada, en coble e collectivament : tot çò que cal per bolegar, se bidorsar e virolejar. E per l’intellècte, presaretz l’ancoratge istoric de cada dança : l’associacion CORDAE/La Talvera nos balha la frucha de son trabalh de collectatge de musica e de danças en Albigés, Roèrgue e Carcin.
Alara, vos desiri un fum de moments convivials, d’encontres excepcionals e de descobèrtas estonantas. E se las masquetas son totjorn d’actualitat al moment de la pareguda d’aqueste numèro del Diari, doblidetz pas de sorrire amb los uèlhs 😉
A lèu a la Tuta !
