Magistre dau Pilo
M’agrada de vi faire de retrats aquì. D’una man perqué mi plas de parlar dei gens en qu vòli de ben e de l’autra perque la vida de la nòstra lenga e dei nòstri pràcticas culturali es totjorn ligada a d’actors que li an dedicat una partida de la sieu vida. Ancuèi doncas, Julien Alquier. Vi vau pas mentir, siam amics despí mai de 20 ans, mi perdoneretz alora lo costat agiografic.
Lo pilo, un espòrt nacional niçard
Denant de contuniar lo mieu fiu sus Julien Alquier, vequí un pichin ponch règlament. Lo pilo es un juèc de carrièras, que naissèt gauch ai pèças de 10 e 25 centimes traucadi, tipo “Lindauer”. Lu pichoi s’enavisèron qu’embé un tòc de papier, podion fabricar un volant a bòn pati. Comencèron a si faire de passas au pen, sensa faire calar en tèrra lo pilo (coma si pòu veire en To catch a thief d’Hitchcock).
Pi en li annadas 70, lo juèc de carrièras si transformèt a pauc a pauc en espòrt embé l’establiment de règlas. L’espòrt si juega alora 2 còntra 2, sobre una grana crotz pintada en tèrra que separa 4 redons. Li chormas, en diagonala, devon mandar lo pilo en un dei redons de l’adversari. Lo mai simple es bensai d’escotar Nux Vomica per tot acapir.
Un engatjament de 20 ans
Embé Julien, si siam doncas conoissut au licèu en lo 2000, gauch au juèc dau pilo. Lo veíi jugar despí la mieu sala de classa e eu mestrejava ja la pèça embé lo sieu partenari (spoiler alert : juègon totjorn ensem despí mai de 20 ans e son estats 3 còps campions dau monde). Comenceriam alora a militar ensem embé lu cors d’occitan e lo desfolopament dau juèc.
Julien Rivière e Julien Alquier
La promiera tapa dau nòstre engatjament per lo pilo foguèt de pilhar un apontament embé lo cap d’establiment dau Parc Imperial, lo nòstre licèu. Embé un bòn milierat de liceans, anar rescontrar lo provisor d’un tau establiment èra quauqua ren d’un chícol intimidant a 16 ans. Pura lo nòstre dorsier l’avia convint e aviavam poscut faire traçar de terrenhs de pilo en la cort, a la pintura (pusleu que de lo tornar faire au cada jorn au senòri).
Despí Julien a jamai arrestat : iniciacion per li joves generacions, organizacion de competicions, creacion de la Liga de Pilo (premier campionat de pilo que si juega sus d’una sason entièra, creat en lo 2011) e sobretot li victòrias a Coarasa, país conoissut en Occitània tota per li sieu poetas (lu fraire Pelhon, lu Mari…) ma finda per lo sieu Campionat dau Monde que si debana alhà despí li annadas 80.
E Julien a pas laissat calar l’ensenhament dau Niçard. Après d’aver seguit lu cors de Patrici Arnaudo au Parc Imperial, es devengut magistre e fa despí d’ans un travalh d’iniciacion en li sieu classas coma au nivèu academic estent que lo sieu travalh en cultura, en lenga e en pilo fa referéncia au nivèu pedagogic.
Alora faguetz coma Julien e faguètz volar lo pilo !
