Adieu barraca !

Ai fach « all-in », avii toi lu « atots » dau mieu costat, « belòta e rebelòta » o simplament aver de cartas en la mànega… Lu juecs de cartas an laissat totplen d’expressions en lo lengatge dau cada jorn e lo nissart non fa excepcion, gauch au vito.

Es ver que parangoneat au piloLo pilo es un espòrt d’adreça embe un peça traucada que sierve de volant e que si juga embe lu pens. o a la morraLa morra es un juec de mans, matematic., lu doï espòrts nacionals nissarts que conoisson encara ancuei una practica reguliera, lo vito a un pauc desapareissut dau paisatge ludic nissart.

Pura, quora sies cuech, qu’es la fin, que meme pregar non faria mestier, lo vito desbarca : « Adieu barraca » diran lu buòi Nissarts.

L’expression es doncas tirada d’un juec, raça de poker, que la mençònega e l’esbrofa son li claus per ganhar. Una partida es compauvada de diferenti menas mas un jugaire segur de la sieu man pòu cridar « barraca », per tot jugar sus d’una soleta mena. « Adieu barraca » marca doncas la desfacha d’una dei doï equipas.

L’interès d’aqueu juec es l’emplec de la lenga occitana. Meme quora li partidas si fan en francés, li anonças son en òc. La tòca es de faire d’encants per marcar de ponchs : se un jugaire brama « tres », lo sieu adversari respònde alora « passi » per laissar lu ponchs, « pròva » per segre o encara « sieis », « dotze » e meme « barraca » per faire montar lu encants.

L’expression, restada populara, s’afichet sus li t-shirts dei supporters dau Gym quora lo club a deugut tralaissar lo sieu vielh estadi dau Rai e si ve totjorn sus lu vestits dei marcas un pauc bobò de Nissa que suerfan sus la vaga dau nissart, a costat de « baieta », « mefi » o « pitchon ». Avetz pas besonh de lo mi demandar, segur que lo nòstre artista Ben n’a fach una placa embé la sieu famoa escritura blanca sus fons negre.

Foguet meme una pista dau premièr album de Nux Vomica, Carneval Nissart. La banda a Pastorelli avia registrat e remixat totplen de cançonetas tradicionali sota aqueu títolo de Adieu barraca.

Aüra conoissetz lo triatlon nissart, que demanda mai de gaube que l’Iron Man sus la prom’ : Morra, Pilo e Vito !