Tres libres per cantar
La lectura d’aqueste polit exemplari del Diari vos a donada l’enveja de far restontir vòstra votz e coneissètz pas las paraulas ? Aquí per vos una seleccion de tres libres de cants que, en mai d’aquò, vos faràn passejar de Gasconha fins a Auvèrnha !
Amb per començar 100 Cantas causidas e presentadas per Bernat Casanava, libre pichon, que vos poiretz far siègre pertot, e que dedins i trobaretz las paraulas de cantas gasconas de las conegudas, e d’autras que meritarián de n’èsser mai. Auretz pas pus de rason per cantar pas a plen tutèl dins les repaisses de fèsta !
Puèi dins Se canta que cante, poiretz descobrir 154 cançons tradicionalas collectadas per l’associacion CORDAE / La Talvera dins maitis departaments : Tarn, Avairon, Òlt, Erau… Cada cançon i es acompanhada d’una traduccion e, pels musicians, d’una particion.
E se vos estimatz mai d’escotar abans de cantar, Chansons d’Auvergne – Cançons de la vida de Alain Bruel, Didier Huguet e Jean-Claude Rocher es acompanhat per un CD. I poiretz entendre le prumièr coblet de caduna de las 125 cançons d’aqueste obratge e caduna i es presentada amb sa particion, sas paraulas, las variantas e mai la traduccion francesa. De qué contentar tanben les començants dins la lenga.
