La brandada de mongetas
Es un plat provençal, plan conegut al país marselhés. Lo vèrb « brandar » vòl dire « remenar », « bolegar » qu’es çò que cal far amb las mongetas per ne far una purèia abans d’i ajustar l’òli e lo lait, coma dins la renommada brandada de Nimes. Es coma un hummus mas amb de mongetas. Se manja sus de lescas de pan fregit.
Ingredients
Preparacion
Se comença per pelar la ceba, li farem un talh en crotz pas gaire prigond e farem de lescas de pan. Puèi metrem las mongetas qu’auràn passat la nuèit dins l’aiga dins una ola e sul fòc cobèrtas d’aiga. Ajustarem la ceba e tres o quatre alhs sens los pelar. Salpebrarem e al primièr bul, baissarem lo fòc per daissar bulir suaudament. Mentretant vuejarem mièg det d’òli dins una padena sul fòc, tot docetament. Quand l’òli serà caud, i metrem las lescas de pan e las fregirem d’un costat e de l’autre. Al cap d’una ora o mai, las mongetas còitas, (aquò depend de las mongetas e de la qualitat de l’aiga) atudarem lo fòc, tirarem la ceba e los alhs e colarem las mongetas. Las vuejarem plan estorridas dins un mixer amb un mièg veirat d’òli d’oliva e i ajustarem un raig de lait per aver la consisténcia que volèm. Fin finala, o metrem dins un plat e o portarem en taula amb la sièta de lescas de pan fregidas.
Variants
Se pòt ajustar dins l’ola un branquilhon de farigola o una fuèlha de laurièr. A Marselha es costuma d’i ajustar un tròç de bostarga (uòus de peis) o uns filets d’anchòias esbocinats. S’i pòt tanben ajustar un raig de chuc de limon, o una mica d’alh picat.