Lo Centre Cultural Occitan de l’Albigés (CCOA) consacrarà los meses de junh a setembre al colonèl Teyssier. Serà un omenatge ambe mantunas parts :

• « Teyssier : le colonel, l’érudit, l’occitan », una mòstra bilingüa francés occitan sus l’ensemble de sa vida personala, militara e culturala ;

• l’edicion de l’ensemble de l’òbra occitana del colonèl en grafia normalizada, e dins l’annada, traduccion francesa ;

• lo divendres 14 de junh a la comuna d’Albi, a la Sala dels Estats, l’estrena de la mòstra ambe una jornada de comunicacions e d’animacions al torn del colonèl.

Lo coronèl Teyssier es plan conegut dels Albigeses : son estatua tròna al cap de l’avenguda que pòrta son nom. Après aver participat a las campanhas de Crimèa e d’Italia, jol règne de Napoleon III, que i fosquèt grèvament ferit, foguèt nomat, en 1870, comandant de la plaça de Bitche (al nòrd dels Vòges). La guèrra de 1870 ambe l’Alemanha comença. Mentre que las armadas de Napoleon son vençudas, el resistirà eroicament a l’ofensiva dels Prussians e dels Bavareses duscas en 1871. Fauta de consignas de son governament, refusa la dintrada als Alemanhs pendent un mes dins la ciutadèla de Bitche ! Caput lo coronèl !

Prendrà sa retirada a Albi tot aureolat de glòria, dins un país traumatisat per la desfacha e la pèrda de l’Alsàcia e la Lorena. Aquela glòria l’acompanharà pendent tota sa retirada albigesa, que ocuparà dins de nombrosas societats culturalas o patrioticas, e tanben dins son contact ambe de membres del Felibritge, l’associacion que regropa los escrivans de lenga d’òc al torn de Frederic Mistral.

Presidirà tre son retorn a Albi e duscas a sa mòrt en 1916, la Societat de las Sciéncias, Arts e Bèlas Letras de Tarn, editritz de la Revista de Tarn.

Es per aquò qu’aculhirà a Albi, en 1882, la fèsta annadièra del Felibritge, la Santa Estèla, e vendrà amic de Frederic Mistral.

Dins las annadas 1900-1914 publicarà dins la Revista de Tarn un quarantenat de pèças, principalament de contes, en occitan.

Lo CCOA reedita tota aquela òbra, après l’aver transcricha en grafia occitana classica. Una mòstra es estada realizada a l’ocasion sus l’ensemble de la vida del coronèl. Lo libre e la mòstra son estats presentats al public pendent una serada conferéncia-animacion a la comuna d’Albi, a la sala dels Estats, lo divendres 14 de junh de 2019, a partir de 4 oras. Après de comunicacions de Bertrand de Viviès (president de la SSABLT) e de l’equipa del CCOA e d’un aperitiu, la serada contunhèt ambe de lecturas de contes de Teyssier e de cants occitans de son epòca.

La mòstra serà presenta al Centre occitan Ròcaguda, 28 carrièra Ròcaguda a Albi, de diluns a dissabte de 3 oras a 6 oras del ser pendent los meses de junh, julhet e setembre (levat tampaduras per congèts del personal).

Per mai d’informacion :

Centre Cultural Occitan de l’Albigés

28 rue Rochegude 81000 ALBI

05 63 46 21 43

centre-occitan-rochegude@orange.fr

http://www.centre-occitan-rochegude.org/