L’Ermès de Montalban en Oklahoma

Avèm sovent preses los aventurièrs per d’ideaires, a l’imatge de Don Quichòt o Tartarin de Tarascon. Pasmens, los admiram tanben, aqueles apassionats que fasián dire a Kerouac : « Las solas personas vertadièras per ieu son los bauges, los que son bauges d’enveja de viure, bauges d’enveja de parlar, d’èsser salvats, bauges de desir per tot a l’encòp, los que badalhan pas jamai e que dison pas jamai de banalitats, mas que brutlan, brutlan coma de fuòcs d’artifici extraordinaris ». Jean-Claude Drouilhet es un d’aquestes e, a son dire, garirà pas jamai de son baujum.