Seleccionar una pagina

La Guinhada

0 |

Espòrts tradicionals

Diga ! Ne va dels espòrts tradicionals coma de nòstras lengas dichas regionalas, amagats, son tenguts luònh dau rambalh mediatic e los practicants dels primièrs son sovent los parlaires de las autras. Anar mortifèr o presa de consciéncia mai bèla d’unes que se vòlon pas diluir dins la borbolhada unifòrma e sens chuc ni muc que nos servisson cada jorn ? Palet vendeenc, chistera, quilhas de uòch demòran confidencials a d’unes ròdols, enveirents davant las maquinas a sòus que son venguts fotbòl, basquet e tenís. E, nombroses son aqueles qu’an desoblidat qu’aqueste darrièr trapa son origina dins lo jòc de pauma, e son nom dins l’anonci « tenètz » que se fasiá au moment de servir. Rai.

E los Occitans, dins aquel afar ? Me remente ieu d’aver signat dins un temps una peticion que demandava legitimament, au vist de la composicion de l’equipa, que la còla de França de rugbi de XV se sone còla d’Occitània de rugbi… E puòi çai venguèt l’argent, a bodre, e los amics descorats, tot contunhant de trepar las tribunas de son estadi, se repleguèron sus lo XIII, aquò òc !

Per çò de la petanca, nos auriá pas escapada tanben la petanca ? Que non pas ! Tant que las platanas butaràn pas au Nòrd, tant qu’espetaràn las galejadas a l’entorn d’una partida, que rajarà lo pastagàs, que Faní ofrirà son detràs a la piqueta dels perdents, las competicions oficialas, pecaire, seràn pas qu’un paure rebat de çò que desgaunhan.

Vòls que te diga ? Nos caudriá pasmens questionar, los d’Erau, perqué lo XIII d’una man, lo buòu de l’autra, s’arrèstan sus las canças de nòstre agre e perqué se practican sonque aicí tambornet o ajustas ?

Bon, per las ajustas, a Carcassona, lor mancariá benlèu quicòm… Encara que la canau dau Riquet i poiriá far.

A la condicion d’anar virar a Tolosa !

Enfin, es çò que ne dise ieu !

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Domenge Caucat

Orientau dau Lengadòc, escotaire naturau d’una lenga qu’èra a mand de s’escondre luònh de la vida vidanta, l’anère quèrre ont s’amagava : de la plaça dau vilatge a la cava cooperativa, dels corses de l’escòla vièlha dau Paratge a la fac, promocion « botifarras ». Memòri sus La Campana de Magalouna. Montamametas dins la vida vidanta per faire bolhir una topina magrostina (topina or not topina ? Aquò’s aquò la question !), m’entache de portar aquela lenga un pauc d’en pertot ont barrutle tant coma amb los amics de la Roquetia - lo país que Max Roqueta i fasiá de doctor - o au dintre de l’IEO. E...rau ! Aime la Santa Verge, lo vin d’aquí, la filosofia dau maset e la galejada clapassièira. Enamorat de garriga e de Verd Paradís.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.