Lo tapís de mossa de Jean Grey
Adieu ! Qu’es lo Capitani Lemosin, lo supereròi occitan plan conegut, que vos parla dempuei son repaire secret ‘captat jos la vila de Limòtges.
E coma tot bon repaire secret, lo meu a sa sala d’espòrt, e, sens voler èsser pretenciós, semble Oliver Queen quand fau quauquas traccions. Perque, coma avem pas tots los superpoders d’un Spiderman o d’un Captain America, nos fau de l’entraïnament per gardar nòstra musculatura impressionanta. Sabe que mai d’un d’entre vautres, lectritz e lectors, aimariá obténer un tau còrs e s’engatja sus lo chamin per se’n aprueimar. Las practicas esportivas coma lo fitness s’espanden dins la populacion dau temps que l’imaginari collectiu assimila los noveus còdis d’aparéncia fisica que los supereròis afichan.
Entau, lo matin, enfila ta tenguda en fibra sintetica, motlanta e confortabla, emb sas colors vivas. Te sentes coma Jean Grey quand despleja lo tapís de mossa blu e enchadena las pompas, flexions e estiraments jos l’uelh amusat dau cachaniu. Ton grand passarà ben « musculacion » coma espròva d’espòrt au bachelierat, perque ne’n fariàs pas te atot ? E lo pitit fariá ben de se mesfiar, podriàs ben venir lo Fenix Sorne per de bon !
Nòta dau Capitani :
Jean Grey es actualament la mutanta la mai poderosa dau Monde. Recentament, atenguet lo maximum de sas capacitats en venir lo Fenix Sorne… puei petet tot !
