Seleccionar una pagina

Dins lei tribunas

0 |

L’OM, allegoria fotbolistica de Marselha

OLIMPIC
DE MARSELHA

La vila de Marselha es sovent vista e viscuda coma una excepcion francesa. Coma aquò s’estonaram pas que l’es tanben l’Olimpic de Marselha demieg lei clubs de fotbòl francés. « Marseille c’est pas la France », una expression populara que si pòu legir sus un paret au dedins de l’estadi Velodròm, resuma pron ben aquela situacion. En Euròpa, lo fotbòl francés es particulier dins lo sens que l’a generalament un sol club professionau per ciutat. Empacha pas l’OM de recampar de suportaires d’un pauc pertot, dins d’autrei regions occitanas emai a París e sa banlèga.

Mai l’OM, mai que mai, representa Provença. De bandairòlas redigidas en lenga nòstra, cada an ne viam au Velodròm. Ansita, lo grop dei Fanatics conoissut per si revendicar provençau avans que tot afichava « sian pas francés, sian marsilhés », quauquei setmanas après la victòria francesa a la copa dau monde. Autrei còps vigueriam « d’un vièi pople fièr e libre », « ti fau bolegar e sautar per l’OM », aquò apondut en de bandairòlas en francés que ramentan que Marselha es capitala de Provença. Lei colors de Provença, lo roge e lo jaune, son de lònga presentas. Dins leis animacions dei grops de suportaires emai fuguèrian estampadas sus la malheta oficala dau club en 2017. Lei Dodgers elei an sa devisa en provençau : « fierta, fervour, fidelita ». Quant ai MTP, que rèstan dins lo quartier de la Plana, fuguèrian bravament influençats per la Chourmo, que lei cançons dau Massilia Sound System an ressonat mai d’un còp au dedins de l’estadi. Emai la melodia de la Copa Santa fuguèt revisitada per ne far un imne a l’Olimpic, imne fòrça popular demieg leis ultras de l’OM.

L’OM es blau e blanc, de còp que l’a roge e jaune donc, e mai arange, la color dei South Winners. D’efiech, en 1989, confrontats ai nèo-nazis dau « Kop Boulogne » dau PSG, lei suportaires marselhés se reviran la vèsta bomber, que son interior es arange, un biais simbolic de s’opausar a l’ideologia racista. Lei grops de suportaires marselhés son d’alhors embessonats ambe de chormas europèanas antifascistas coma Sankt Pauli, Livorna ò l’AEK d’Atenas. Si saup que lo public dau Velodròm es popular e multiculturau. Dempuei leis annadas 60 au mens, l’OM es un bòn mejan d’integracion per leis immigrats e lei tribunas marselhesas son cafidas de drapèus estrangiers, de la nacionalitat dei jogaires mai tanben dei minoritats de la vila. De fach, lo blau-blanc-roge es fòrça mau vist. S’explica notadament per la decision de la Federacion Francesa de Fotbòl, en 1994, de retrogradar l’OM en segonda division per protegir leis interès de l’equipa de França. Pròva d’aquesta ostilitat ai simbòus francés, lei suportaires marselhés regracièron publicament Bulgaria d’aguer empachada França de si qualificar per la Copa dau Monde ais Estats-Units.

La maufisença recipròca entre la ciutat foceana e l’Estat francés a, ben segur, d’originas extra-esportivas : Marselha fuguèt la « vila sensa nom », « per sempre incurabla » en 1794, subissèt l’afaire dau XVen còrs en 1914, ò encara la mesa sota tutèla de París en 1938. Si pòu ausir que la rivalitat entre l’OM e lo PSG fuguèt creada de pè en cima per Bernard Tapie e Canal+ que deteniá au còp lo PSG e lei drechs televisuaus dau fotbòl francés per fin de renauçar l’interès dau campionat francés. Es verai, en partida, mai auriá probablament pas foncionat sensa aqueste passiu cargat entre Marselha e la capitala, que la granda part dei afecionats de l’OM oblidan pas de ramentar quand va pòdon. Fin finala, l’OM es a l’imatge de sa vila : au còp adorada e detestada, son especificitat pivela lei gents ò provòca una mena de repulsion. 2600 ans qu’aquò dura !

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Matieu Casanova

Marselhés de naissença, còrse e piemontés d'origina, exiliat en Biarn pendant dètz ans. Faguèri lo jornalista a Ràdio País a Pau quauqueis annadas avans que de tornar au mieu. Ai redigit d'articles per d'unei mèdias en lenga nòstra e fuguèri animator de l'Ostau dau País Marselhés. M'agradan l'istòria, lo fotbòl e lo chich kebab, tres causas que se marridan perfectament s'avèm un pauc d'imaginacion.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.