Conilh a las anchòias
Las anchòias agradan sus la còsta de la Mediterranèa emai dintre las tèrras. Coma es un produch de la mar, los plats amb d’anchòias son tipics de la còsta. Aital es pel conilh amb d’anchòias conegut al Montpelhierenc. Es un lapin fregit e bolhit que s’i ajusta una picada d’anchòias per li donar aquela sabor de mar.
Ingredients
Preparacion
Començar per atalhonar lo lapin e vuejar un rag d’òli dins un plat de tèrra qu’anarà sul fòc suau. Quand l’òli fresina, i metrem lo conilh e lo rossirem. Lo remenarem amb la culhièra de fusta que se rossisca de cada costat. Quand es rossit, i vuejam un gòt de vin blanc e una mica d’aiga e pujam lo fòc. Salpebram, i ajustam la farigola e un parelh de fuèlhas de laurièr e quand bolhís, rebaissam lo fòc e lo daissam còser a fòc suau amb lo cabucèl sus la caçòla.
D’aquel temps passam las anchòias jos l’aiga de la canèla per ne traire la sal e tiram los filets. (Se pòt tanben far amb sièis filets d’anchòias a l’òli). Picar las anchòias al mortièr. Puèi espotir tres grans d’alh ; picar tres ramelets de jolverd. Al cap de vint minutas de bolh ajustar las anchòias, l’alh e lo jolverd. Alara copar lo pan en dats e los fregir dins una padena amb un bocin d’òli d’oliva. Los remenar per los daurar coma cal e los metre dins las siètas. Quand farà trenta o quaranta minutas que bolhís lo conilh, se tirarà la caçòla de sul fòc e se servirà dins las escudèlas suls crostilhs daurats.
Variantas
S’i pòt ajustar una caçada de bolhon o uns branquilhons de romanin.