Arrés non ei mort ! Enfin… arrés ? Los joens de 3au bilingüe deu Collègi François Truffaut de Sent Martin de Senhans (Lanas) no’n son pas tan segurs, e b’an avut paur.

Tà passar lo temps au cors d’ua nueit dehòra enter bòsc, arriu e segrat, lo grope de joens qu’avó l’idea esmiraglanta de har un “chic o chac de l’estranh”, mes tot non s’i debanè pas com at avèn previst… Dauna blanca, camacruda, e autas legendas de noste que vadón vivas entà semiar esvarge e dobte enter los nostes praubes amics. Saunei o vertat ? N’at saberam dilhèu pas jamei. Mes çò qui arrés non dobterà, qu’ei l’estrèita qui los collegians estón gahats.

Si’n voletz descobrir l’istòria sancèra, en quate minutas de videò, que’vs dam rendetz-ve sus octele.com : programa Clinhada, episòdi Causas que hèn paur. Aqueste còp, que son los eslhèves eths-medishs qui at hesón tot ! Que son estats a l’encòp scenaristas e actors de l’istòria (tarrible !) qui’ns volèn contar, e que constateratz que son plan valents !

En l’emission Clinhada, que poderatz trobar mantuns autes projèctes, de tipes variats, miats per o dab joens de noste ; n’esitetz pas ad anar véder lo lor tribalh !