Lo Diari, lo magazine de la cultura en occitan, sortís d’un estiu malaisit.

Avèm cregut pas poder veire lo lum de la rentrada, onèstament. Èra question de subvencions, vos en podètz dobtar, mai largament de l’avenidor – en suspens – del Diari, del seu projècte e de la siá portada.

Sembla pasmens que la situacion siá a se regularizar e podretz veire la fin de l’annada tras los uèlhs del Diari, amb per començar un n°51 dedicat a la cosina, gessit al mitan dels nòstre pensaments e de la tofor estivenca !

Tot aquò, aquel estiu passat a atendre de responsas que venián pas, a cridar e sonar dins lo void, a esperar un Godot subvencional, nos far prene consciéncia que la situacion actuala del Diari es fragila, fugidissa, passadissa.

Aquel magazine, vengut l’an passat magazine en linha, es primièr vòstre magazine, vòstre agach sus la cultura en occitan, un uèlh e un esperit unic dins un còs plan fach. Coma tot çò qu’es unic, e coma tot çò qu’es en occitan, es freule e de mal assegurar.

Es per aquò que, mai que jamai, avèm besonh de vosautres. En dos mots : Abonatz-vos ! Aquò serà lo prètz de nòstra linha editoriala 100% occitana, curiosa, variada, plurala, mesclada, renovelada, e tot çò que voldretz que venga.

L’abonament es lo primièr sosten al Diari, e lo mai important. Abonatz vòstres dròlles, vòstres parents, vòstra bibliotèca de quartièr, vòstra escòla de vilatge…

Avètz ja abonat tot lo monde ? E ben dins aqueste cas podètz encara far un don per sosténer l’activitat del Diari (fasèm lo recebut per que siá deductible dels impòsts), simplament, amb un pichon formulari disponible sul site. Vos daissam quitament la possibilitat de vos abonar E de donar quicòm mai !

Mercejam fòrça los que nos sostenguèron fins aquí, mercejam per avança los que nos sostendràn a comptar d’aquí e vos disèm a plan lèu dins las paginas del Diari per un numèro especial… per çò que al Diari, totes los numèros son especials !

La còla del Diari