ÒCtele que se’n torna sovent tà l’escòla… entà har sortir los joens de las parets deu lor establiment. Qu’avè dejà començat dab la longa lista de T’òcT’òc, adara arrestada, mes lo moviment que contunha desempuish tres ans dab l’emission Descobr’aquí.

Qu’at avem dejà mentavut ací dens Lo Diari, Descobr’aquí qu’ei ua emission on ua classa de collègi o licèu e va a la descobèrta de lòcs emblematics o tèmas atipics mes dilhèu pas pro coneguts. Qu’èm anats descobrir l’art de l’enluminadura dab collegians d’Usercha en Corresa, investigar los mistèris de l’aur blanc dab los de Salias de Biarn, o enqüèra encontrar vacas vasadesas dab joens de Lengon en Gironda, per exemple. Mes la descobèrta que pertòca tanben lo tribalh de l’audiovisuau per’mor aus joens que’us balham camèras e micròs entà que poscan participar au filmatge de la lor emission, preparada amassa dab eths, l’ensenhaire, l’equipa d’ÒCtele e monde o associacions deu parçan. Tota ua organizacion ! E tota ua corsa per’mor un còp organizat lo rodatge, que i a de qué har : dus episòdis de 13 minutas dab la medisha classa en un sol dia qu’an d’estar filmats ! Los joens n’an pas desmeritat quan veden enfin publicat lo resultat deu lor tribalh quauques mes après e, que v’at disi shens har deu flambard, lo resultat que n’ei tostemps beròi e plen de suspresas.

Professors, que demoram las vòstas classas d’occitan tà la seguida !

Peu moment, establiments de Navèra-Aquitània sonque e pòden participar, mes qu’esperam que serà bèth dia possible en autas regions.

Aquesta emission qu’ei realizada dens l’encastre de Contracte d’Objectius e de Mejans enter ÒCtele e la Region Navèra-Aquitània.