Lo comportament del consumeire càmbia
Fargat a l’ostal
Òctele vos prepausa “Fargat a l’ostal”, la cronica que vos ensenha a far a l’ostal de produits mai ecologics e mai economics
La societat càmbia e lo comportament dels consumeires passa pauc a pauc a l’ora de la luta contra lo cambiament climatic. L’idèa es de consumir mens, de degalhar mens. L’idèa de limitar la quantitat de brutissas e de degalhs s’impausa pauc a pauc. Son de mai en mai nombroses los que vòlen far las causas en defòra del circuits industrials classics. L’òra del “fargat a l’ostal” es arribada… o es tornada.
I a per exemple lo retorn de l’òrt. De poder semiar e plantar de produits que seràn consumits sus plaça es ara la tendéncia. Pels qu’an un troçòt de tèrra es pro aisit. Sufís de metre en òbra de tecnicas novèlas de cultura, mai respectuosas de la tèrra.
Mas pels qu’an pas d’òrt, la tendéncia es tanben de far a l’ostal de causas que son utilas per la vida de cada jorn sense las anar crompar al supermercat. Es dins aquela amira que Òctele vos prepausa “fargat a l’ostal” una cronica novèla que vos farà descubrir las causas que se pòdon far simplament a l’ostal, que son mai economicas e mai ecologicas que los produits industrials qu’utilizam ara. Finalament tot aquò es dins la dralha del consumir simple e cort. Mens d’energia degalhada, mens de transpòrt, mai de simplicitat e una eficacitat autan granda.
Maud dubrís aquela cronica amb un primièr numèro que vos ensenharà a fabricar un shampong solide e ecologic. L’òra del “zèro degalh” es arribada. Nos i metèm ?
Aquela cronica es disponibla sul site de ÒCtele mas tanben sul canal Youtube de ÒCtele qu’es ara dubèrt e que prepausa un fum de programas.